Ташкент ақпараттық технологиялар университетінің профессоры Дилдора Мухаммадиева жетекшілік ететін ғылыми топ сүт безі қатерлі ісігін клиникалық белгілер пайда болмай тұрып анықтай алатын жасанды интеллектке негізделген инновациялық жүйе әзірледі. Бұл — Өзбекстан ғылымындағы медициналық технологиялар бағытындағы ең ірі серпілістердің бірі болып саналады.

Жаңа бағдарлама рентгендік бейнелерді талдау арқылы микрокальцинаттар мен өзге де патологиялық өзгерістерді анықтап, дерттің алғашқы кезеңінде-ақ диагноз қоюға мүмкіндік береді. Тәжірибелік кезеңде жүйе 3000 науқастың бейнелерін 96 пайыздық дәлдікпен сараптап, жоғары нәтижеге қол жеткізді.

Бағдарлама қашықтан және нақты уақыт режимінде жұмыс істей алады. Бұл мүмкіндік ауылдық және шалғай аймақтардағы емдеу мекемелеріне де дер кезінде сапалы диагностика жүргізуге жол ашады. Сонымен қатар, жүйе нәтижелерді түрлі түстер шкаласы арқылы көрсетеді: жасыл — қауіп жоқ, көк — қосымша бақылау қажет, қызыл — шұғыл тексеру мен ем қажет екенін білдіреді.

Жасанды интеллект микрокальцинаттардың тығыздығы мен пішінін, олардың орналасу ерекшеліктерін жоғары дәлдікпен саралап, жиегі тегіс емес немесе ине тәрізді қатерлі ісіктерді сенімді түрде ажырата алады.

Профессор Мухаммадиева атап өткендей, бұл жоба халықаралық тәжірибелер мен заманауи алгоритмдер негізінде әзірленген және ол болашақта ұлттық медициналық цифрлық платформа ретінде дамытылмақ.

Қазіргі уақытта жүйе жетілдіру сатысында. Әрбір жаңа клиникалық дерек пен бейнелер қоры жасанды интеллекттің тану қабілетін арттырып, оның жылдамдығы мен дәлдігін үнемі жақсартып отыр.

Мамандардың пікірінше, бұл жоба медицина саласында ерте диагностика мәдениетін қалыптастырып, мыңдаған әйелдің өмірін сақтап қалуға септігін тигізуі мүмкін.