Божхона қўмитаси томонидан ҳуқуқни муҳофаза қилувчи орган ходимлари билан ҳамкорликда заргарлик буюмлари ноқонуний айланмасининг олдини олиш борасида тезкор тадбир ўтказилди.

Олиб борилган тезкор тадбир давомида олдиндан кузатувга олинган фуқаро бир жуфт тилла зиракни 1,1 миллион сўмга сотаётган вақтида тадбир иштирокчилари томонидан тўхтатиб қолинди. 

Унда фуқаронинг қўл юклари белгиланган тартибда кўздан кечирилганида унинг ичида хорижда ишлаб чиқарилган, ҳеч қандай тегишли ҳужжатлари бўлмаган 6 турдан иборат, дастлабки қиймати 550 миллион сўмлик 576,8 гр тилла ва кумуш тақинчоқлар борлиги аниқланди. Ушбу заргарлик буюмлари ашёвий далил сифатида вақтинча сақловга олинди. 

Хоразмда кузатилган ҳолатда эса, олдиндан шубҳа остига олинган шахс тегишли рухсатномасиз (лицензиясиз) тилладан тайёрланган 5,95 грамм оғирликдаги 1 дона узукни ноқонуний равишда сотаётган вақтда тўхтатиб қолинди. 

Олиб борилган тезкор тадбир давом эттирилиб, мазкур фуқарога тегишли савдо шохобчаси холислар иштирокида кўздан кечирилганида, ҳеч қандай ҳужжатлари бўлмаган 1 кг.дан ортиқ оғирликдаги заргарлик буюмлари борлиги аниқланди. 

Ҳозирда қиймати дастлабки ҳисоб-китобларга кўра 1 миллиард сўмни ташкил қилувчи 1 кг.дан зиёд оғирликдаги заргарлик буюмлари вақтинча сақловга олинди. 

Ҳозирда юқоридаги ҳар иккала ҳолат юзасидан терговга қадар текширув ҳаракатлари олиб борилмоқда.

Ш.Маматуропова, ЎзА