Зараркунанда ва бегона ўтларга қарши кураш
Одамлар орасида “ўсимликларга «шира» тушди!”, «япроқлари қовжираб қолди!», “мева дарахтларининг баргларида «нуқта»лар пайдо бўлди!” деган гапларни кўп эшитяпмиз.
Одамлар орасида “ўсимликларга «шира» тушди!”, «япроқлари қовжираб қолди!», “мева дарахтларининг баргларида «нуқта»лар пайдо бўлди!” деган гапларни кўп эшитяпмиз.
Зарарли организмлар нафақат фермер хўжаликлари ер майдонида, балки шахсий томорқаларда ҳам тез-тез учрамоқда. Шунингдек, бегона ёввойи ўтларнинг кўпайиши ҳам айрим томорқа ер эгаларини ташвишга солмоқда.
Ўсимликларда учраётган ушбу зараркунандаларга қарши курашишда ҳудудларда ташкил этилган «ўсимликлар клиника»ларининг ўрни беқиёс.
Ўзбекистон Республикаси Вазирлар Маҳкамасининг 2018 йил 15 сентябрдаги «Ўсимликлар клиникалари фаолиятини ташкил этиш чора-тадбирлари тўғрисида» даги қарори ижроси доирасида Хоразм вилоятида 15 та ўсимликлар клиникалари ташкил этилган.
Жумладан, Ҳазорасп тумани «Бўстон» маҳалласидаги клиникада ҳар қандай зараркунандаларга қарши воситаларни топиш мумкин. Энг муҳими муассаса мутахассислари етарлича тажрибага эга бўлиб, ўсимликларни зараркунандалардан асраш борасида тўғри маслаҳат бера олади.
–Клиникамиз кимёвий ва биологик йўналишда комплекс хизмат кўрсатади, – дейди «Ҳазорасп Мегафлора» ўсимликлар клиникаси раҳбари Замира Матёқубова. – Мижозларимизга фақатгина лицензия ва сертификатга эга бўлган, синовдан ўтган, сифатли препаратларни таклиф қиламиз. Шу кунларда минг гектар пахта, ғалла ва шоличилик билан шуғулланадиган фермер хўжаликлари билан шартнома имзолаганмиз. Шунингдек, 500 дан ортиқ томорқа ер эгалари ва хонадонлар бизнинг хизматимиздан фойдаланмоқда.
Клиникалар фаолияти Ўсимликлар карантини давлат инспекцияси томонидан назорат қилинади. Яъни клиникадан сотиб олган препарат натижасини инспектор жойига бориб ўрганади ва текшириш ишларини амалга оширади.
–Ҳозирги вегетация даврида қишлоқ хўжалиги экинларини ва бошқа турдаги ўсимликларни карантиндаги зараркунанда ва турли ёввойи ўтлардан ҳимоя қилиш муҳим саналади, – Хоразм вилояти Ўсимликлар карантини давлат инспекцияси инспектори Ёрқин Қозоқов. – Шу сабабдан зараркунандаларга қарши курашда кимёвий ва биологик воситалардан фойдаланишда фермер хўжаликлари ва томорқа ер эгаларига тегишли тавсияларни бериб бормоқдамиз. Бугунги кунда аҳоли ҳам ўз бошимчалик билан йўл тутмасдан биз томондан берилган барча тавсия ва маслаҳатларга амал қилаётгани келгуси фаслда давлатимиз омборлари ва юртдошларимизнинг дастурхони тўкин бўлишини таъминлайди.
Боғот тумани Ашхобод маҳалласида жойлашган ўсимликлар клиникасида зараркунанда ва бегона ёввойи ўтларга қарши 40 дан ортиқ дори препаратлар мавжуд. Ҳозирда туман бўйича 110 та фермер ва тадбиркорлар билан шартнома асосида иш олиб бориляпти. Эътиборлиси, туманнинг энг чекка ҳудудларига бориб назорат ўтказиш учун ҳар бир ҳудуд инспектори мототцикл билан таъминланган. Бу эса ишни самарали олиб боришда муҳим ҳисобланади.
Янгибозор туманида ташкил этилган ўсимликлар клиникасида ғалла, ғўза ҳамда барча турдаги ўсимликлар касаллиги ва зараркунандаларига қарши курашиш учун препаратлар мавжуд.
–Туманимизда ташкил этилган ўсимликлар клиникаси хизматидан икки йилдан буён фойдаланиб келмоқдаман, – дейди томорқа ер эгаси Ойбек Яқубов. – Ҳудудий инспекторимизнинг маслаҳати билан куз ва қиш фаслида ҳам томорқамга ишлов бердим. Қувонарлиси ўз вақтида биологик воситалар ёрдамида ишлов берилса, кимёвий препаратларга ҳожат қолмайди. Шу сабабдан соҳа мутахассисларига ўз миннатдорчилигимни билдираман. Юртдошларимиздан эса зараркунандаларга қарши сотиб олган препаратларни билиб-билмай ўсимликларга ишлатмасликни сўраган бўлардим.