Ўзбекистон мудофаасига кўмаклашувчи “Ватанпарвар” ташкилоти Зарафшон шаҳар ўқув спорт техника клуби(ЎСТК) томонидан шаҳар ички ишлар, спорт, тиббиёт ва маданият бўлимлари, “Олтин водий” газетаси ҳамкорлигида ташкил этилган мусобақада Учқудуқ, Хатирчи, Қизилтепа ва Нурота тумани ҳамда Зарафшон шаҳар ЎСТК спортчилари иштирок этди.

Қизғин давом этган мусобақа якунида ВП 2 машқида ўғил болалар ўртасида биринчи ўринни мезбон жамоа – Зарафшон шаҳар ЎСТК спортчиси Д.Кенжаев қўлга киритди. Мазкур йўналишда иккинчи ўрин хатирчилик Н.Бегмаматов, учинчи ўрин эса қизилтепалик спортчи М.Каримовга насиб этди.

Қизлар ўртасида ўтказилган ВП 2 машқида ҳам биринчи ўрин мезбонларга насиб этди. Хусусан, Зарафшон шаҳар ЎСТК спортчиси С.Элмуродова юқори натижа қайд этиб, ғолибликни қўлга киритди. Иккинчи ўринга қизилтепалик спортчи Ш.Жалолова, учинчи ўринга эса нуроталик спортчи К.Неъматуллаева сазовор бўлди.

Ўғил болалар ўртасида ўтказилган ПП 1 машқида ҳам зарафшонлик спортчи зафар қучди. Шаҳар ЎСТК спортчиси Х.Ҳайдаров ушбу йўналиш ғолиблигини қўлга киритди. Иккинчи ўринни қизилтепалик С.Мухтаров эгаллаган бўлса, учинчи ўрин учқудуқлик Т.Тоировга насиб этди.

Худди шу йўналиш бўйича қизлар ўртасида ўтказилган баҳсларда биринчи ўринга Хатирчи тумани ЎСТК спортчиси М.Муртазаева сазовор бўлди. Иккинчи ўринни зарафшонлик Р.Бекмуродова, учинчи ўринни эса нуроталик Ғ.Амонова эгаллади.

Умумжамоа ҳисобида Зарафшон шаҳар ЎСТК жамоаси биринчи ўринни эгаллади. Иккинчи ўрин Қизилтепа тумани ЎСТК, учинчи ўрин эса Хатирчи тумани ЎСТК жамоасига насиб этди.

Мусобақа ғолиб ва совриндорларига диплом ва эсдалик совғалари топширилди.