Сўнгги кунларда дунёнинг бир қатор мамлакатларида коронавирус инфекцияси билан боғлиқ эпидемик вазият яна мураккаблашмоқда.

Айниқса, Жанубий Корея, Вьетнам, Германия ва Хитой каби давлатларда кунлик касалланишлар сони кескин ортиб бораётгани кўпчиликни жиддий ташвишга соляпти. 

Юртимизда эса аксинча, хасталикнинг тарқалиш кўрсаткичи тобора пасайиб, вазият ижобий томонга ўзгармоқда. Буни  кунлик касалланишлар сонидан ҳам билиш мумкин. Бироқ дунёдаги эпидемиологик вазиятнинг қалтис эканини эътиборга олсак, мамлакатимизда хасталикнинг юқиш хавфи ҳамон юқорилигича сақланиб қолаяпти. 

Айни пайтда Зангиота 1 ва 2-сон юқумли касалликлар шифохонасидаги вазият ҳақида ССВ матбуот хизмати маълум қилди.  Бугунги кунда ушбу тиббиёт муассасаларида қанча бемор даволанаётганини очиқлади. 

Маълум бўлишича, бугунги кунда мазкур шифо масканларида жами 556 нафар бемор бўлиб, уларнинг 42 нафари оғир, 52 нафари эса ўта оғир аҳволда. 

— Юртимизда эпидемик вазият барқарорлашгани боис муассасамизга келаётган беморлар сони сезиларли даражада камайди, — деган Зангиота 1-сон юқумли касалликлар шифохонаси директори Анвар Ҳусанов. — Жумладан, ҳозир шифохонамизга бир кунда ўртача 40-45 нафар бемор мурожаат қилиб, уларнинг 30-35 нафари соғаймоқда. 

Ваҳоланки, жорий йилнинг январь ойи ўрталарида бу борадаги вазият анчагина мураккаб бўлиб, кунига ўртача 300-400 нафар бемор олиб келинган ва уларнинг 200-300 нафари госпитализация қилинган эди. 

Таъкидланишича, бугунги кунда шифохонага келаётган беморларнинг аксариятида касаллик енгил кечиб, асосан иситма, бош оғриғи ҳамда ҳолсизлик каби белгилар билан намоён бўляпти. 

Қолаверса, кўпчилик беморларда сатурациянинг пасайиши ва ўпканинг зарарланиши деярли кузатилмаяпти. Вируснинг жиддий асоратлар билан кечиши эса нисбатан кам. 

Шифокорнинг айтишича, бу хотиржамликка берилиш учун асос бўла олмайди. Сабаби коронавирус мутацияга учрашини инобатга олсак, вазият тез ўзгариши мумкин. 

Шундай экан, юртдошларимизнинг касалликка қарши тўлиқ ва бустер дозаларда эмланишларини тавсия қилинади. Чунки вакцина олгандан сўнг шаклланган иммунитет хасталикни ўтказгандан кейинги ҳимоядан яхшироқ. 

ЎзА