“Posco International Textile” МЧЖ хорижий корхонасининг Бухоро йигирув фабрикаси негизида жорий  йилдаги ҳудудий инвестиция дастурига асосан 9 миллион АҚШ доллари миқдоридаги сармояга асосан ташкил этилган.

Корхона замонавий, илғор корхона бўлиб, олий пахта навлари асосида мато ва йигирув ипларни ишлаб чиқишга ихтисослашган. Бу ерда ишлаб чиқариладиган калава иплари ҳам, тўқув ҳам трикотаж тўқиш усулларига тўла мос келади.

Туркиядан келтирилган замонавий дастгоҳлар билан жиҳозланган ушбу фабрика йилига 15 минг тонна ип-калава ишлаб чиқариш қувватига эга. Бу йилига 300 миллиард сўмлик ишлаб чиқариш, 10 миллион АҚШ долларлик экспорт, бюджетга қўшимча 12 миллиард сўмлик қўшимча тушум деганидир.

Фабрикада 450 нафарга яқин етук мутахассис замонавий технология ютуқларидан фойдаланган ҳолда ишлаб чиқаришда иштирок этмоқда.

Зариф Комилов, ЎзА мухбири.