Jamiyat tomonidan “Oʻzsanoatqurilishbank” viloyat filiali kredit liniyasi hisobiga Xitoy Xalq Respublikasida ishlab chiqarilgan 11 dona “JAC Sunray” rusumli zamonaviy mikroavtobus olib kelindi. Bu ulovlar yoʻlovchi tashishda va ichki turizm tarmogʻida foydalanishga xizmat qiladi.

Shaharning Ark qoʻrgʻoni oldida mikroavtobuslar taqdimot marosimi boʻlib oʻtdi. Unda tegishli tashkilotlarning mutasaddilari, sayyohlik kompaniyalari xodimlari, tadbirkorlar, “JAC MOTORS” kompaniyasining respublikamizdagi rasmiy dilleri vakillari, turizm va transport xizmati koʻrsatuvchi korxonalar rahbarlari qatnashdi.

Marosimda soha vakillari soʻzga chiqib, mamlakatimizda, jumladan viloyatda aholiga zamonaviy transport xizmati koʻrsatish sohasida amalga oshirilayotgan ishlar xususida toʻxtaldi. Shuningdek, bu borada tijorat banklari tomonidan berilayotgan imtiyozlarning afzalligi yigʻilganlarga qiziqish uygʻotdi. Kelgusida aholiga namunali transport xizmatini koʻrsatish borasida tadbirkorlar tomonidan yana-da koʻplab xayrli ishlarni amalga oshirish choralari koʻrilishi aytib oʻtildi. Bu borada rasmiy diller bilan kelishuvlar toʻgʻrisida ham atroflicha maʼlumot berildi.