Unda bir qancha e’tiborga molik natijalar qayd etildi. Jumladan, Liga 1 va A seriyada kutilgan chempionliklar muddatidan oldin rasmiylashtirildi.

20 aprel sanasida “Alyans Stadium” stadionida Massimiliano Allegri shogirdlari “Fiorentina” klubini qabul qilib, 2:1 hisobida g‘alaba qozondi. Natijada “Yuve” turnir yakunlanishiga 5 tur qolganida Italiya chempionligini qo‘lga kiritdi.

Rasman 117-mavsum o‘tkazilgan birinchilikda turinliklar o‘z tarixida 35-, ketma-ket esa 8-marotaba “skudetto” sohibiga aylandi. Shuni qayd etish joiz, mazkur natija kuchli beshlik chempionatlarida yangi rekordga aylandi. Bundan oldingi rekord 2002-2008 yillar oralig‘ida, Fransiyada qatorasiga 7 marta tengsiz bo‘lgan “Lion” klubiga tegishli edi.

Fransiyada ham chempion muddatidan oldin aniqlandi. Ketma-ket mag‘lubiyatlardan so‘ng “Pari Sen-Jermen” klubi yakshanba kuni navbatdagi chempionlikni qo‘lga kiritdi. 33-turda “Tuluza” jamoasining turnir jadvalida 2-o‘rinda borayotgan “Lill”dan ochko tortib olishi va oradagi farqning 16 ochkoga yetishi Tomas Tuxel shogirdlariga g‘oliblikni taqdim etdi. Shu tariqa parijliklar mazkur sovrinni so‘nggi 8 mavsumda 7-marotaba, o‘z tarixida esa 8-bor yutib olishdi.