«Ювентус» муддатидан олдин чемпион бўлган, «Интер» эса кумуш медални «Аталанта»дан «тортиб» олди
Кеча тунда Италия чемпионатининг сўнгги 38-тур доирасидаги ўнта ўйин бўлиб ўтди ва унда бир қатор кутилмаган натижалар қайд этилди.
Ўзига ҳам, «Рома»га ҳам ҳеч қандай аҳамияти бўлмаган учрашувда «Ювентус» кутилмаганда 1:3 ҳисобида мағлубиятга учради.
Айтиш мумкинки, Роналдунинг ёрдами билан ниятига етган «кекса синёра»нинг Роналдусиз ҳатто ўз майдонида ҳам иши юришмади. Роналду жамоадошларининг мағлубиятини майдон ташқарисида, Дибала билан хотиржам кузатиб ўтирди. Чунки «аза» тутишга сабаб йўқ эди.
Турнинг марказий учрашуви сўзсиз «Аталанта» ва «Интер» жамоалари тўқнашуви эди. Кумуш медаль тақдири ҳал этиладиган ўйинда «Аталанта»нинг имкониятлари юқори баҳоланаётганди. Сабаби рақибларидан атиги бир очко ортда бораётган «Аталанта» ўз майдонида тўп сураётган, «стадион деворлари» ҳам уларни суяб юборишидан умид қилаётган эди. Бироқ «сценарий» бузилди – «Интер» биринчи дақиқаданоқ мақсади жиддий эканлигини исботлади. Аввалига Данило ДЪАмброзио илк дақиқадаёқ ҳисобни очди, 20-дақиқада эса Эшли Янг ҳисобни йириклаштириб, масалани деярли ўзлари фойдасига ҳал этиб бўлишди.
Кеча бўлиб ўтган ўйинларда қуйидаги натижалар қайд этилди:
Брешия – Сампдория - 1:1
Аталанта – Интер - 0:2
Милан – Каляри - 3:0
Наполи – Лацио - 3:1
Ювентус – Рома - 1:3
Бугун тунда бўлиб ўтадиган учрашувлар:
СПАЛ - Фиорентина
Женоа - Верона
Болонья - Торино
Сассуоло - Удинезе
Лечче - Парма