Жорий йилнинг 20-24 июнь кунлари Германиянинг Дюсселдорф шаҳрида бўлиб ўтадиган “Tube and Wire Fair 2022» халқаро кўргазмасида «Ўзелтехсаноат» уюшмасига аъзо 10 га яқин корхоналар ўз маҳсулотлари билан иштирок этади.

Қайд этиш керакки, электротехника соҳасида Ўзбекистон-Германия ўртасидаги савдо ва товар айланмасини ошириш ҳамда Европа компаниялари билан ҳамкорликни йўлга қўйиш мақсадида юртимиздаги электротехника корхоналари ушбу кўргазмада илк маротаба иштирок этмоқда. Бу эса Ўзбекистон электротехника саноати корхоналарининг Европа бозорларига кириб бориш учун кенг имкониятлар эшигини очади.

– Кўргазма доирасида нафақат иштирок этиш, балки Германиянинг нуфузли компаниялари билан инвестиция ва экспорт имкониятларини кенгайтириш мақсадида бир қатор учрашувларни режалаштирганмиз, – дейди уюшма Бошқарма бошлиғи И. Ҳомидов. –Бу билан биз Европанинг қатор компанияларини Ўзбекистонга кенгроқ жалб этиш ва ушбу мамлакатга экспорт шартномаларини кўпайтириш бўйича аниқ таклифлар билан боряпмиз. Шу бўйича амалий натижалар билан қайтишимизга ишонаман.

ЎзА