Ўзбекистонда ёзги Олимпия ўйинларининг 28 та спорт турининг 42 йўналиши мавжуд бўлиб, фақат иккита спорт тури – скейтбординг ва сёрфинг давлат рўйхатидан ўтмаган эди.

Мамлакатимизда очиқлик сиёсати юргизилиши натижасида олимпия спорт турлари тизимида ҳам ижобий натижаларга эришиш сари дадил қадам ташланди.

Бир гуруҳ ташаббускорларнинг саъй-ҳаракати билан ўтган йили скейтбординг ҳамда ралли спорт турларини оммалаштирадиган Ўзбекистон скейтбординг ассоциациясига асос солинган эди.

Куни кеча ушбу спорт ташкилоти давлат рўйхатидан ўтказилди.

Бу эса мамлакатимиз ёшларининг яна бир спорт тури бўйича халқаро мусобақаларда, олимпия ўйинларида тизимли иштирок этиш бўйича ҳуқуқий асос яратилганлигидан далолат.

Т. Рўзиев, ЎзА