Толали экинлар илмий-тадқиқот институти олимлари Ўзбекистоннинг иқлим шароитида толали зиғир етиштириш имкониятларини ўрганмоқда. Тадқиқотлар доирасида зиғирнинг “Avgustin”, “Aksent”, “Grant”, “Lada” ва “Dukat” навлари лаборатория ва дала шароитида синовдан ўтказилмоқда.

Шунга кўра, дастлабки босқичда институт лабораториясида “Avgustin”, “Aksent”, “Grant” ва “Lada” навлари уруғларининг униш энергияси аниқланган. Маълумотларга кўра, кейинчалик Тошкент вилоятининг Қибрай туманидаги тажриба майдонида танланган навлар экилди. Уруғлар 10–12 кун ичида униб чиқишни бошлаган, тўлиқ униб чиқиш эса 20–22 кунда кузатилган.

Умумий унувчанлик 80–90 фоиз атрофида бўлиб, энг юқори натижани “Grand” ва “Avgustin” навлари 90 фоиз билан кўрсатган. Энг паст унувчанлик эса “Дукат” навида қайд этилиб, 80 фоизни ташкил этган.

Илмий ходимларнинг таъкидлашича, ушбу тадқиқотлар мамлакатимизда толали зиғир етиштириш имкониятларини баҳолаш ва қишлоқ хўжалиги саноатига янги истиқболларни очиб беришда муҳим аҳамиятга эга.

Гулноза Бобоева,

ЎзА