Қишлоқ хўжалиги экинлари уруғчилигини тубдан модернизация қилиш, сифатли ва рақобатбардош уруғлик маҳсулотларини ишлаб чиқаришни кенгайтириш бугуннинг долзарб масаласидир.

2022 йилдан бошлаб, республикада биринчи марта сабзавот, полиз, дуккакли, мойли ва бошқа экинларнинг уруғчилигини ташкил этиш учун 13 минг 395 гектар ер майдонлари ажратилди.

«Ўзагроинспекция» Ахборот хизмати томонидан тақдим этилган маълумотларга кўра, жорий йилдан бошлаб, 3 минг 278 гектар сабзавот, 1,0 минг гектар полиз, 1 минг 330 гектар мойли, 2 минг 65 гектар картошка, 2 минг 376 гектар дуккакли экинлар ва 2 минг 442 гектар озуқа экинларининг сара уруғлигини етиштириш ташкил қилинади.

Қорақалпоғистон Республикаси ва вилоятларда ушбу майдонларда уруғчилик етиштирувчи хўжалик субъектлари ўртасида ихтисослаштириш бўйича танловлар ўтказилди. Танловда уруғлик етиштириш учун бугунги кун талабига жавоб берадиган 4 минг 669 та хўжалик субъектлари ғолиб деб топилди.

Шундан 71 та туманнинг 288 нафар хўжалик субъектларини 3 минг 385 гектар ер майдонлари сабзавотчиликка, 50 та туманнинг 117 нафар хўжалик субъектларининг 978 гектар ер майдонларида полизчиликка, 55 та туманнинг 339 нафар хўжалик субъектларининг 1 минг 349 гектар ер майдонлари мойли экинлар, 63 та туманнинг 162 нафар хўжалик субъектларининг 2 минг 365 гектар ер майдонлари дуккакли экинлар ва 61 туманнинг 345 нафар хўжалик субъектларининг 2 минг 370 гектар ер майдонларида озуқа экинларининг уруғчилиги йўлга қўйилади.

Бугунги кунда уруғлик учун экилган майдонларда агротехник тадбирларни ўз вақтида сифатли амалга оширилиши ва уруғлик майдонларида дала апробация кўриклари ўтказилишида яқиндан амалий ёрдам бериш бўйича бир қатор ишлар белгилаб олинган.

ЎзА