Хабарингиз бор, кеча 9 январь куни мамлакатимизда коронавируснинг Omicron штамми билан илк касалланиш ҳолати қайд этилгани юзасидан расмий маълумот берилди. Унга кўра, мамлакатимизга келган хорижий давлат фуқаросидан COVID-19нинг янги – Omicron штамми 7 январь куни аниқланган.

Аммо Санитария-эпидемиологик осойишталик ва жамоат саломатлиги хизмати бошлиғи ўринбосари Нурмат Отабеков 8 январь куни ССВ Матбуот хизмати орқали Ўзбекистонда Omicron аниқланмаганини таъкидлаган эди.

Ахборот ва оммавий коммуникациялар агентлигида ўтказилган матбуот анжуманида  ушбу ҳолатга мутасаддилардан изоҳ сўралди. 
Санитария-эпидемиологик осойишталик ва жамоат саломатлиги хизмати бошлиғининг биринчи ўринбосари  Холмамат Норбоевнинг изоҳича,  Omicron штамми дастлаб 7 январь куни аниқланди. Бироқ ушбу ташхис бўйича дунёнинг етакчи мутахассислари билан маслаҳатлашиш, узоқ текширувлар ўтказиш ва уни тасдиқлаш билан боғлиқ жараёнлар туфайли уни ўз вақтида эълон қилиш имкони бўлмаган ва икки кундан сўнг жамоатчиликка маълум қилинди.  Қизиқ,  Нурмат Отабековнинг ўша кунги баёнотига қараганда, юзага келган жараёнлардан хабари бўлмаганми?

Моҳигул Қосимова, ЎзА