– Тадбиркорлар интиқлик билан кутган мулоқотҳам бўлиб ўтди. Бизни ҳайратга солган нарса бу Президентимиз тадбиркорларнинг дилидаги гапларни билишлари бўлди. Шунақа жўшиб ҳамма муаммоларни ечиб бердики, кўнглимиз тоғдек кўтарилди.

Президентимизнинг бир пурмаъно гаплари бор. Ҳаёт бор экан муаммо бўлади. У шиддат билан давом этяпти. Шундай экан ҳар йили муаммолар ҳам, камчиликлар ҳам бўлади. Уларни ўз вақтида ечиб борилиши мамлакат тараққиётининг асоси ҳисобланади. Кейинги йилларда тадбиркорларда қийинчилик пайдо бўлса, кўзини олдига давлат раҳбарини келтирадиган бўлган. 

Кўп тадбиркорлар билан мулоқот қиламан. Қийналиб турган вақти, албатта битта қарор чиқадики, ўшанинг муаммоси ечилиб кетади. Мана кеча Президентимиз айнан бизнинг вилоят Қашқадарё учун жуда муҳим масалани таъкидлаб ўтди – “Қашқадарёда газ кўп бўлса ҳам Қашқадарёнинг кўплаб жойларида газ йўқ”. Бу айнан вилоятимизга тегишли бўлган катта муаммо ҳисобланади. Бугунги мулоқотда Президентимизга ўз фикрларимни айтишга муваффақ бўлдим. Таклифлар бердик. Тўғриси, юртбошимиз маърузани бошлашларидан аввал талайгина саволлар ҳамда муаммоларни ўртага ташлайман деб турган эдим. Лекин маърузанинг ўзидаёқ барчасига ечим топилди. Биз бундан чексиз миннатдормиз. 

Президентимиз битта гапни айтдилар: “Тадбиркорликни ҳамма ҳам қила олмайди”. Бу айни ҳақиқат. Мамлакатда иш ўрни яратаётган асосий соҳа умуман дунё мамлакатларида ҳам кичик бизнес субъектларидир. Кичик маблағ ҳисобига кўплаб иш ўринлари яратади. Бундан ташқари, Президентимиз тадбиркорларни ўйлантириб келган яна бир муҳим масалани ечиб берди. 

Яқинда қарор чиққан эди, 1 июлдан бошлаб, бўш турган биноларга оширилган солиқ қўлланилмайди, деб. Кеча шу кунгача ҳисобланган оширилган солиқ яъни триллион-триллион сўм маблағдан тадбиркорлар фойдасига кечилди. Тадбиркорлар бундан ниҳоятда хурсанд. Бу тадбиркорликни ривожлантириш учун катта туртки бўлади. Чунки триллионлаб сумма тадбиркорларнинг бўйнида турган эди. 1 июлдан ўша солиқларнинг бекор қилиниши, умуман воз кечилишининг ўзи катта тарихий воқеа бўлди.

Алишер Бойқараев,

Китоб туманидаги “Севаз андроникс” корхонаси раҳбари

ЎзА