– Пенсионерга ўз вақтида олинмаган нафақа қандай тартибда тўланади?

– Шунингдек, хорижда бўлган қариндошининг пенсиясини ишончнома орқали олиш мумкинми?

Шу каби саволларга бюджетдан ташқари Пенсия жамғармаси ходими Элдор Худойбердиев  жавоб берди:  

– “Фуқароларнинг давлат пенсия таъминоти тўғрисида”ги Қонуннинг  59-моддаси ва  Вазирлар  Маҳкамасининг "Давлат пенсияларини тайинлаш ва тўлаш тартибини янада такомиллаштиришга йўналтирилган норматив-ҳуқуқий ҳужжатлатишларини тасдиқлаш тўғрисида"ги қарори мавжуд. Мазкур ҳужжатлар ва давлат пенсияларини тайинлаш ва тўлаш  тартиби тўғрисидаги низомнинг 169-бандларига кўра, вақтида олинмаган пенсияни тўлаш тартиби белгиланган. Бу ҳолатда пенсиянинг ҳисобланган суммаси ўтган вақт учун пенсиялар миқдорлари оширилиши ҳисобга олинган ҳолда бир йўла тўланади. 

Шунингдек, Ўзбекистон Республикаси Вазирлар Маҳкамасининг 252-сонли қарори ва давлат пенсияларини тайинлаш ва тўлаш тартиби тўғрисидаги Низомнинг 160-бандига  кўра, хорижда бўлган фуқаро Ўзбекистон Республикасига кела олмаган пайтида ишончнома орқали пенсия тўланиши мумкин.

Бунинг учун Ўзбекистон ташқарисида расмийлаштирилган ишончномага ҳужжат расмийлаштирилган давлатнинг ваколатли давлат органи томонидан апостиль қўйилиши лозим. Бунда  ишончнома  берган шахс пенсия тўлайдиган Пенсия жамғармаси бўлимига бир йилда камида бир марта келиши керак. Бу билан фуқаро тайинланган пенсияга бўлган ўз ҳуқуқини тасдиқлайди. 

Вакил пенсия тўлашга таъсир этилиши мумкин бўлган барча ҳолатлар ҳақида Пенсия жамғармаси бўлимига хабар бериши шарт. 

Бунда фуқарога Ўзбекистоннинг дипломатик ваколатхоналари ва консуллик муассасалари томонидан 3 хил мазмундаги маълумотномалар берилади. Шундан кейин пенсия тикланиб, 12 ойдан ошмаган муддатга тўлаб берилиши мумкин. 

Мафтуна Каримова, ЎзА