Фарғона вилоятида 2024 йилнинг январь-август ойларида 632 та экспортёр иштирокида 555,6 млн. долларлик экспорт амалга оширилди. Бу 2023 йилнинг мос даврига нисбатан 16,8 фоизга кўпдир. Бундай натижага тадбиркорликни ривожлантириш, янги очилган ишлаб чиқариш корхоналари ва саноат корхоналарини модернизация қилиш, қишлоқ хўжалигидаги ислоҳотлар туфайли эришилди. Айни чоқда импорт ҳажмини қисқартириш учун унинг ўрнини босувчи маҳсулотлар ишлаб чиқариш кенгайтирилди. Натижада 2024 йил январь-август ойларида ўтган йилнинг шу даврига нисбатан импорт ҳажми 16,8 фоизга камайди.

Аммо... вилоятдаги Ёзёвон туманида аксинча экспорт камайиб, импорт кўрсаткичи ортиб бораётганини кузатиш мумкин. 2024 йил январь-августида вилоят статистика бошқармаси тарқатган маълумотда таъкидланишича, туманда атиги 4,3 млн. долларлик экспорт қилиниб, шу вақт ичида 13 баробар кўп – 57,3 млн. долларлик импорт қилинган. Тўғри, туманга зарур технологик воситалар ҳам олиб келинаяпти. Аммо экспорт миқдори Ёзёвонда вилоят кўрсаткичининг бир юз-у ўттиздан бирини ташкил этиши ҳали бу борада жуда кўп иш қилиниши лозимлигини кўрсатади.

Муҳаммаджон Обидов, ЎзА