Тәуелсіз этика комитеті ФИФА-ның бұрынғы президенті Йозеф Блаттер мен бұрынғы бас хатшы Жером Валькені ФИФА-ның этикалық кодексін бұзғаны үшін кінәлі деп тауып, футболмен байланысты барлық әрекеттерге тыйым салынды. Дисквалификация мерзімі 6 жыл 8 айға жалғасады.

ФИФА бұдан бұрын Блаттерге қарсы қылмыстық іс қозғау жайлы Цюрих Кантонының прокуратурасына арыз жіберген болатын. Оған себеп, Блаттер және басқа да бірқатар адамдар 2016 жылы Цюрихте ашылған Дүниежүзілік футбол мұражайының құрылысына қаражаттың негізсіз жұмсалуына әкеп соқтырған келісімшарттарға қатысты деп күдікке ілінген.

Тәуелсіз этика комитеті қабылдаған шешімге сай жазаланушы тарап 6 жыл 8 айға мерзімге футболдан шеттетілуден бөлек, 1 млн швейцар франкі көлемінде айыппұл төлейді.

Өткен жылдың қараша айында Швейцарияның федералды прокуратурасы Йозеф Блаттер мен УЕФА-ның бұрынғы президенті Мишель Платиниға қатысты тергеуді кеңейткен болатын.

Прокуратура берген мәліметте, оларға байланысты «алаяқтыққа күдікті» деген күдік бойынша да жауап алынып жатқаны айтылған. Сол себептен тергеушілер ФИФА-ны 1998 жылдан 2015 жылға дейін басқарған Блаттердің 2011 жылы ұйымнан Платиниге 2 миллион швейцар франкін (1,8 млн еуро) аударған-аудармағанын тексеріп жатыр.