Кеча Сингапурнинг Тошкентдаги ТМС институтида “Қувноқлар ва зукколар” кўрик танловининг факултетлараро босқичи бўлиб ўтди. Унда Иқтисод ва Педагогика йўналиши талабалари ўзаро куч синашдилар.

Муҳтарам Президентимиз Ёшлар масаласини, хусусан уларнинг бўш вақтларини тўғри  ташкил этиш зарурлигини тез-тез таъкидлайдилар. Шу маънода, бугун ТМС институтида бўлиб ўтган тадбир ҳам Президент фикрларига ҳамоҳанг бўлди.

Танловда институтнинг “Парламент” ва “Феникс” жамоалари беллашдилар. Талабаларнинг ҳар бир шарт бўйича чиқишлари маънога бой, бугунги талабалар фаолиятидаги камчиликларни фош этишга қаратилган ва шунингдек юмор руҳида бўлди.
Талабалар саҳна кўринишлари орқали юксак актёрлик салоҳиятига эга эканлигини исбот қилишди. “Феникс”  жамоасидан Шалола Исломова, Шаҳзода Сайфиддинова, Фазилат Рўзматова, Солиҳа Сулаймонова, Мубина Маҳмудовалар фаол иштирок этиб, ўзларининг ҳам қувноқ, ҳам зукко эканликларини намойиш этдилар.

“Парламент” жамоасидан эса Диана Тўраева, Нозима Абдукаримова, Иброҳим Зиёдуллаев,  Шуҳрат Каримов, Аброр Пардаевлар фаол иштирок этишди.

Бир сўз билан айтганда, талабалар нафақат илм олишда, балки санъатда ҳам ҳеч бир муболағасиз жуда маҳоратли эканликларига амин бўлдик.

“Қувноқлар ва зукколар” танлови шоирнинг “Ёшликда ёш бўлган яхшидир” сатрини эсга солди. Улардаги жўшқинлик, қайноқлик, завқни кўриб, беихтиёр “Офарин, ёшлик” дейсан киши.

Ойдин Йўлдошева, ЎзА