Yoshlar ishlari agentligi tomonidan O‘rta Chirchiq tumanidagi mahallalarda faoliyat olib borayotgan yoshlar yetakchilari bilan uchrashuv bo‘lib o‘tdi.

Yoshlar muammolarini hal etish,  ularga amaliy yordam berish ishlarini tizimli tashkil etish maqsadida tashkil etilgan uchrashuvda har bir yetakchining mahallasidagi vaziyat atroflicha muhokama qilindi.  

 Qayd etilganidek, O‘rta Chirchiq tumanidagi 57 ta mahallada 14-30 yoshdagilar 29 ming 133 nafarni tashkil etib, ularning 534 nafari “qizil” toifaga kiritilgan.    

Shuningdek, tumanda 1 ming 294 nafar maktab bitiruvchilaridan 354 nafari oliy ta’limga, 575 nafari doimiy ish o‘rinlariga joylashtirildi. Tumandagi ishsiz yoshlar soni 523 nafar bo‘lib, shundan bandligi ta’minlangan yoshlar 210 nafarni tashkil etadi.    

Suhbat davomida har bir yetakchining o‘z mahallasidagi yoshlar bilan olib borayotgan tizimli ishlari, ularga ko‘rsatilayotgan ko‘mak va tashabbuslar muhokama qilindi. Yetakchilarga kelgusida bajarishi kerak bo‘lgan vazifalar xususida tegishli topshiriqlar berildi.    

Gulnoza Boboyeva,  

O‘zA