Пойтахтимизда Ёшлар ишлари агентлиги директори Алишер Саъдуллаев бошчилигида ўтказилган навбатдаги йиғилишда ёшлар тадбиркорлигини ривожлантиришга қаратилган "BIZ COMBINATOR" лойиҳаси доирасидаги устувор йўналишлар ва келгуси режалар муҳокама қилинди.

Тадбирда қайд этилганидек, "BIZ COMBINATOR" — бу ёшларни шунчаки бизнесга жалб қилиш эмас, балки уларни тизимли фикрлайдиган, глобал рақобатбардош ва барқарор тадбиркорлар сифатида шакллантиришга қаратилган комплекс платформа.  

Тақдимотда ёшлар тадбиркорлигини ривожлантириш бўйича таълим, менторлик ва акселерация йўналишлари атрофлича таҳлил қилиниб, уларнинг иқтисодий самарадорлиги, реал бизнес натижалари ҳамда халқаро тажрибалар асосида кенгайтириш режалари муҳокама этилди.

Шунингдек, ёш тадбиркорлар учун амалий бизнес ва акселерация дастурларини жорий этиш, маҳаллий ва халқаро экспертлар иштирокида менторлик ва индивидуал қўллаб-қувватлаш механизмларини кенгайтириш, "BIZ COMBINATOR"  орқали ёшларни масофавий тадбиркорлик таълими билан қамраб олиш ҳамда инновацион бизнес ташаббусларини молиявий ва стратегик жиҳатдан қўллаб-қувватлаш йўналишлари бўйича аниқ вазифалар белгилаб олинди.

Қайд этилганидек, мазкур йўналишлар натижасида ёшлар "BIZ COMBINATOR" платформаси орқали билим билан бирга реал бизнес модели ва бозорга чиқиш имкониятига эга бўлади. Мазкур ташаббус ёшлар тадбиркорлигини ривожлантиришда давлат ва хусусий сектор ҳамкорлигини мустаҳкамлашга хизмат қилади.

Гулноза Бобоева, ЎзА