Жиззах вилоятида 18 ёшгача бўлган йигит ва қизлар ўртасида волейбол бўйича вилоят кубоги мусобақаси бўлиб ўтди. Икки кун давом этган беллашувларда вилоятнинг шаҳар ва туманларидан жами 26 та жамоа ғолиблик учун кураш олиб борди.

Қизлар ўртасидаги мусобақада Зарбдор туманининг волейболчилари юқори маҳорат ва жипслик намойиш этиб, ғолибликни қўлга киритишди. Зомин туманининг қизлар жамоаси иккинчи, Шароф Рашидов туманининг волейболчи қизлари эса учинчи ўринни эгаллашди.

Йигитлар баҳси ҳам қизғин кечди. Якуний натижаларга кўра,  Пахтакор тумани волейболчилари биринчи ўринни эгаллаган бўлса, Шароф Рашидов ҳамда Бахмал туманлари жамоалари мос равишда иккинчи ва учинчи ўринларни қўлга киритишди.

Мусобақа якунлангач, ғолиб ва совриндор жамоалар Жиззах вилояти ИИБ, вилоят волейбол федерацияси ҳамда вилоят спорт бошқармаси томонидан медал, диплом ва эсдалик совғалари билан тақдирланишди.

Таъкидлаш жоизки, мусобақада кучли учликдан ўрин олган жамоалар таркибидан энг иқтидорли волейболчилар сараланиб, вилоят терма жамоаси шакллантирилди. Айнан шу терма жамоа   республика босқичида Жиззах вилоятининг шарафини ҳимоя қилади.

А.Қаюмов, Ж.Ёрбеков (сурат), ЎзА мухбирлари