Hindistonda o‘smirlar o‘rtasida tennis bo‘yicha “Dehradun open – 2025” xalqaro turniri o‘tkazilmoqda. Quvonarlisi, mazkur musobaqada mamlakatimiz sharafini himoya qilayotgan tennischilarimiz muvaffaqiyatli start oldi.

Yakkalik bahslarning birinchi bosqichida hamyurtimiz Danila Kvasov hindistonlik Advit Tivarini 7:5, 6:1 hisobida taslim qildi va ikkinchi davrada Ashrav Yamehra bilan raqobatlashadigan bo‘ldi.  

Qizlar orasidagi yakkalik musobaqasida Samira Qoziyeva mezbonlar vakilasi Rit Arorani uch setda – 6:3, 2:6, 6:1 hisobida mag‘lubiyatga uchratdi. Shu tariqa nimchorak finalga chiqqan Samira chorak final yo‘llanmasi uchun o‘tadigan o‘yinda yana bir mezbon tennischi Partsarti Arun bilan kuch sinashadi.

Shuningdek, juftlik bahslarida Samira Qoziyeva va Shahzoda Ortiqboyeva tandemi ilk davrada hindistonlik Diya Ramesh va Sohini Sanjay juftligiga qarshi kortga chiqadi.

Javohir Toshxo‘jayev, O‘zA