Андижонда давом этаётган Халқаро теннис федерацияси мусобақалар тақвимидан жой олган J30 таснифидаги турнир ўзининг қизғин палласига кирди.

Халқаро мусобақанинг яккалик баҳсларида иккинчи давра босқичи ўз якунига етиб, чорак финал иштирокчилари номи аниқ бўлди.  

Жумладан, ҳамюртимиз Маҳмудбек Бекназаров ушбу босқичда нейтрал теннисчи Иван Чарнишоуга қарши кортга чиқади. Ёш теннисчиларимиз Абдураҳмон Каримов ва Алан Зинатулин ўзаро тўқнаш келади. Яна бир вакилимиз Акмал Абдуллаев эса нейтрал теннисчи Сергей Панков билан куч синашади. Қизлар ўртасида эса Мадинахон Солижонова қозоғистонлик Эвелина Балаганская билан рақобатлашадиган бўлди.

Шунингдек, турнирнинг жуфтлик баҳсларида Асилбек Исмоилов ва Юсуфбек Маликов тандеми қозоғистонлик Арофат Мустафо ҳамда нейтрал теннисчи Андрей Ли дуэтига қарши финал йўлланмаси учун кортга чиқади. Қизлар ўртасида юртимиз шарафини ҳимоя қилаётган Самира Ҳожиева ҳамда Эмили Ким жуфтлиги ярим финал босқичида қозоғистонлик Адема Альсейпулова ва россиялик Илдана Зарипова жуфтлигини синовдан ўтказади.

Жавоҳир Тошхўжаев,

ЎзА