Albaniyaning Durres shahrida shaxmat bo‘yicha 14, 16 va 18 yoshgacha bo‘lgan o‘g‘il hamda qiz bolalar o‘rtasida o‘tkazilgan jahon chempionatida iste’dodli yosh shaxmatchi qizimiz sovrindorlikka erishdi.
Xalqaro shaxmat federatsiyasi (FIDE) shafeligida 11 ta turdan iborat shveysarcha tizimda o‘tkazilgan bahslarda 83 ta davlatning 720 nafar shaxmatchisi uchta yosh toifasining 6 ta guruhida g‘oliblik uchun kurash olib bordi. Ular safida O‘zbekiston terma jamoasining 18 nafar a’zosi chempionatda o‘z yosh toifasida ishtirok etdi.
Musobaqada 10-turgacha mag‘lubiyatsiz harakatlangan Afruza Hamdamova 18 yoshgacha bo‘lgan qizlar bahsida g‘oliblikka yaqin kelgandi. Biroq 10-turda Olga Karmanova(FIDE)ga yutqazib qo‘ydi.
Ushbu yosh toifasida chempionatning 4-turida Hamdamovadan mag‘lubiyatga uchragan xitoylik Muziyan Gao 9 ochko bilan 1-o‘rinni egallagan bo‘lsa, Afruza singari 8 ochko jamg‘arishga muvaffaq bo‘lgan rossiyalik Valeriya Kleymenova va Olga Karmanova qo‘shimcha ko‘rsatkichlarga ko‘ra, keyingi o‘rinlardan joy oldi. Hamdamova 4-o‘rin bilan kifoyalandi.
14 yoshli shaxmatchilar o‘rtasidagi bahslarda dona surgan hamyurtimiz Ruqiya Olimova chempionat kashfiyoti bo‘ldi, desak mubolag‘a bo‘lmaydi. Mahoratli shaxmatchi qizimiz o‘tkazilgan 11 ta turda 9 ochko to‘plab, 2-o‘rinni egalladi va Jahon chempionatining kumush medali bilan taqdirlandi.
Jahon chempionatida shaxmatchilarimizning yosh toifalarida to‘plagan ochko va egallagan o‘rinlari quyidagicha:
Yakuniy natijalar 18 yoshgacha:
Afruza Hamdamova – 8 ochko, 5-o‘rin
Guldona Karimova – 6,5 ochko, 15-o‘rin
Zilola Aktamova – 6 ochko, 34-o‘rin
Vasila Abdujabborova – 5 ochko, 49-o‘rin
Qilichbek Naziraliyev– 5,5 ochko, 66-o‘rin
16 yoshgacha:
Nilufarxon Imomqo‘ziyeva – 7 ochko, 12-o‘rin
Liliya Belaya – 6 ochko, 32-o‘rin
Asrorjon Omonov – 7 ochko, 15-o‘rin
Sa’dullo Azizov – 6,5 ochko, 33-o‘rin
Muhammadyusuf Muhsinov – 6,5 ochko, 42-o‘rin
Xondamir Elmirzayev – 6 ochko, 55-o‘rin
Akbarali Abduhakimov – 5,5 ochko, 72-o‘rin
14 yoshgacha:
Ruqiya Olimova– 9 ochko, 2-o‘rin
Dilnoza Nurullayeva – 6,5 ochko, 27-o‘rin
Davlatova Sevinch – 5 ochko, 63-o‘rin
Shaxzod Islomov– 6,5 ochko, 38-o‘rin
Abdulqodir Bahodirov – 6 ochko, 51-o‘rin
Saidxo‘ja Vohidov– 4 ochko, 126-o‘rin
T.Ro‘ziyev, O‘zA