Хабар берганимиздек, шу кунларда Тошкентда 8 ёшдан 12 ёшгача бўлган ўғил ва қиз болалар ўртасида Ўзбекистон чемпионати баҳслари ўтказилмоқда.

Мамлакатимизнинг турли шахмат клубларида шуғулланаётган 239 нафар иқтидор эгалари қатнашаётган чемпионатнинг стандарт йўналишидаги курашларнинг ортда қолган 3-тур ўйинларидан кейин 8 ёшгача бўлган ўғил болалар орасида 3 очкога эга бўлган 6 нафар шахматчи, ушбу ёш тоифасидаги қизлар баҳсларида 4 нафари етакчилик қилмоқда. 

Мусобақанинг 10 ёшлилар ўрасидаги иштирокчилар орасида ўғил болалар йўналишида 2 нафар, қизлар мусобақасида эса 4 нафари турнир жадвалини бошқариб бормоқда. 

Ўзбекистон чемпионатининг 12 ёшлилар ўртасидаги стандарт йўналишидаги мусобақаларнинг ўғил болалар баҳсида 39 нафар иштирокчи қатнашаётган бўлса, улар орасида Шаҳзод Исломов ва Абдулборий Абдувалиев 3 очко билан пешқадам бўлиб турибди. Мазкур ёш тоифаси қизлар ўртасидаги мусобақаларда иштирок этаётган Дилноза Нуриллаева ҳамда Юлдузхон Ҳамидова чемпионатдаги иштирокида ҳали очко йўқотмасдан 32 нафар иштирокчи орасида етакчига айланиб олган. 

Эртага, 24 февраль куни мамлакат биринчилигида барча ёш тоифалари ўртасидаги 4-тур ўйинлари ташкил этилади. 

Эслатиб ўтамиз, ёш чемпионларни аниқлаш мақсадида ўтаётган чемпионатнинг стандарт йўналиши мусобақалари 9 турдан иборат бўлиб, 29 февралда якунланади. Рапид йўналишидаги беллашувлар 1 март, блиц баҳслари 2 март куни бўлиб ўтади. 

Т. Рўзиев, ЎзА