ФОТОРЕПОРТАЖ

Кеча Ўзбекистон қиличбозлик федерацияси томонидан Бутунжаҳон қиличбозлик кунига бағишланган тадбир ташкил қилинди. 

Бинобарин, бу йил ушбу сана Халқаро қиличбозлик федерацияси (FIE) томонидан “Биз дунёни қиличбозликда олқишлаймиз!” шиори остида нишонланди. Сана муносабати билан пойтахтимиздаги “Пахтакор” қиличбозлик залида ўтказилган тадбирда ёш спортчилар, соҳа фахрийлари, ушбу қадимий спорт тур ишқибозлари, оммавий ахборот воситалари вакиллари ҳозир бўлди.  

[gallery-19274]

Тадбирда  сўзга чиққанлар мамлакатимизда барча спорт тури қаторида қиличбозлик ҳам ривожланиб бораётгани, ёш, иқтидорли қиличбозлар сафи кенгайиб, халқаро ареналарда юқори ўринларни забт этаётганини фахр билан айтиб ўтдилар. Тадбир  шпага йўналишидаги жамоавий мусобақаларга уланиб кетди.  

Қизлар ўртасидаги жамоавий беллашувларда бухоролик қиличбозлар ғолиблик шоҳсупасининг энг юқори поғонасини эгаллади. 2-ўрин Тошкент, 3-ўрин эса Андижон ҳамда Қорақалпоғистон жамоаларига насиб этди.

 Йигитлар ўртасида кечган мусобақалар жудаям кескин ва қизиқарли тус олди. Беллашув натижаларига кўра, бухоролик қиличбозлар ғолиб бўлган бўлса, «Андижон-1» ва «Гулистон-1», «Қорақалпоғистон» жамоалари кейинли ўринларга муносиб топилди.

23 ёшгача бўлган йигит-қизлар ўртасидаги мамлакат кубоги баҳслари 18 сентябрга қадар давом этади.

Муҳаммад АМИН(сурат),ЎзА