Яқинда АҚШнинг Аризона штати, Финикс шаҳрида “Extraction – 2025” конференцияси бўлиб ўтди. Анъанага айланган ушбу халқаро металлургия ва кончилик ҳамжамиятини бирлаштирган “Extraction – 2025”конференцияда саноат амалиётчилари, тадқиқотчилар ва академиклар иштирок этди.

Конференцияда кончилик, минералларни қайта ишлаш, пирометаллургия, гидрометаллургия, электрометаллургия ва шу каби бошқа йўналишлар муҳокама қилинди. Жараёнлар илк бора кўп металли диалог шаклида ташкил этилган бўлиб, мис билан бирга никель, кобальт ва бошқа критик металларни ҳам қамраб олди. 

Шунингдек, техник янгиликлар, жонли тажрибалар, қайта ишлаш жараёнлари, экологик, иқтисодий, бозор омиллари ҳамда саноатдаги илғор тенденциялар ва барқарорлик масалалари муҳокама қилинди. Қувонарлиси, жаҳон саҳнидаги бу нуфузли тадбирда Олмалиқ кон-металлургия комбинатида фаолият юритган, бугунги кунда Япониянинг Акита университетида фан докторлиги бўйича илмий тадқиқот изланишларини олиб бораётган ёш олимлар ака-ука Бобур ва Беҳзод Ғайратов ҳам иштирок этди. 

Улар Ўзбекистон, хусусан Олмалиқ кон-металлургия комбинати конларидаги маъданларни самарали ва атроф-муҳитга зарарсиз усул билан қайта ишлаш ҳақидаги маърузалари билан қатнашди. Мазкур конференцияда “Springer” нашриёти томонидан нашр этилган илмий мақолалар ва техник маърузалардан иборат жамланма ҳам китоб шаклида тақдим этилди.

Жамланмада электролиз жараёнлари, қайта ишлаш, саноат кимёсининг оқибатлари, қайта тикланиш ва чиқиндиларни бошқариш, бозор-иқтисодий таҳлиллар ва бошқалар бўйича кенг кўламли мақолалар жой олган. Фахрланарлиси, ушбу нашрда олмалиқлик ёш олимлар Бобур ва Беҳзод Ғайратовнинг ҳам мақолалари ўрин олган. 

А.Мусаев,ЎзА.