Россия Федерациясининг Магнитогорск шаҳрида ўтказилган XXIII илмий-техник анжуманда Олмалиқ кон-металлургия комбинатининг ёш металлурглари алоҳида эътироф этилди.

Анжуман ҳар йили анъанавий тарзда минглаб ёшларни жалб қилади. Ёш металлурглар анжуман давомида ўзаро тажриба алмашади, ишлаб чиқаришни такомиллаштириш ва сифатли маҳсулот олиш бўйича ўзларининг турли йўналишдаги рационализаторлик таклифлари ва ишланмаларини тақдим этади.

Олмалиқ кон-металлургия комбинатининг Марказий таъмирлаш механика заводи ёш муҳандислари Рустам Парпиев ва Алишер Алиматов ҳам ушбу анжуманда ўз маърузалари ва тақдимотлари билан қатнашди.

Эътиборлиси, металлургия йўналишида иштирок этган ёш муҳандислар таклифлари юқори баҳоланиб, совринли ўринларга сазовор бўлди.

Жумладан, Алишер “Ишлаб чиқишнинг ўзига хослиги” номинациясида, Рустам эса “Энг яхши иқтисодий самара” номинациясида ғолиб бўлди.  Анжуман ташкилотчилари ёшларнинг иқтидор ва салоҳиятини қўллаб-қувватлаётгани учун комбинат раҳбариятига алоҳида миннатдорлик билдирди.

ОКМК ахборот хизмати,

ЎзА