Хабар берганимиздек, Испаниянинг Ла-Нусия шаҳрида бокс бўйича ёшлар ўртасидаги жаҳон чемпионати баҳслари бўлиб ўтмоқда.

Кеча чемпионатнинг бир қатор вазнларида чорак финал баҳслари якунига етди.  

70 дан зиёд давлатнинг 600 нафарга яқин боксчи ўғил-қизлари қатнашаётган мусобақанинг кеча якунланган чорак финал жангларида иштирок этган 6 нафар ҳамюртларимиз ғалабага эришиб, чемпионат медалларига эга чиққан ҳолда олтин медаллар учун курашни давом эттирадиган бўлди.  

48 килограммда Гулсевар Ғаниева Хитой Тайпейи вакиласи Йи-Хуан Гуодан, 54 кило оғирликдаги Хўжаназар Нортожиев ирландиялик Шейн Райяндан, 67 килограммда Жавоҳир Умматалиев Арманистон вакили Арес Хакобяндан, 70 килода Азиза Зокирова қозоғистонлик Гаухар Шаибековадан, 81 килода Олтиной Сотимбоева польшалик Елена Пепекдан ҳамда 75 килограммда медаллар учун курашаётган Тўрабек Ҳабибуллаев Арманистон спортчиси Алик Ованисяндан устун келди.  

Бугун, 22 ноябрь куни давом этадиган чорак финал жангларида 71 килода Фазлиддин Эркинбоев туркиялик Султон Османли билан, 75 кг.да Бахтиёр Асадов марокашлик Сулаймон Самгули билан, 80 кг.да Раҳматулло Бойматов грециялик Михаил Самаладис ҳамда қизлар ўртасидаги 75 килограммда Саҳобат Ҳусанова Эквадор вакиласи Габриелла Казар билан ярим финал масаласини ҳал этади.  

Ёшлар ўртасидаги жаҳон чемпионатининг ғолиблари 26 ноябрда аниқланади.  

Т.Рўзиев,

ЎзА