Ғарб сайёҳлари сўнгги беш йил ичида биринчи марта Шимолий Кореяга киришди.

Ўтган йил Россиянинг бир неча фуқароси ушбу мамлакатга боргани ҳисобга олинмаса, COVID -19 пандемиясидан кейин эндигина баъзи туристларнинг КХДРга киришига рухсат берилди, деб ёзди “Euronews” нашри. Сайёҳлар орасида Буюк Британия, Канада, Греция, Янги Зеландия, Франция, Германия, Австрия, Австралия ва Италия фуқаролари бор экан.

Пекинда жойлашган “Koryo Tours” компанияси 13 киши учун КХДР шимоли-шарқий чегараси яқинидаги Расон шаҳрига беш кунлик сафар уюштирган.

Маълумки, Шимолий Корея одатда чет эллик меҳмонларга нисбатан жиддий чеклов қўяди. Масалан, муайян манзилларда суратга олиш тақиқланади, маҳаллий гидлар билан бирга юриш қатъий талаб қилинади.

2020 йил январь ойида эса ушбу давлат хорижликлар учун чегарани бутунлай ёпган эди.

Пандемиядан олдин дунёдаги энг кучли санкцияланган давлатлардан бири сифатида КХДР учун туризм асосий қонуний хорижий валюта манбаи бўлган.

Жанубий Корея разведка агентлиги томонидан бошқариладиган Миллий хавфсизлик стратегияси институти таҳлилий маркази маълумотига кўра, шу пайтгача Шимолий Кореяга борган сайёҳларнинг 90 фоиздан кўпи қўшни Хитой ҳиссасига тўғри келган.

2022 йилдан чеклов аста-секин юмшай бошлаб, чегаралар қайта очилгач, февралда 100 га яқин Россия фуқароси мамлакатга киришига рухсат берилган.

Мусулмон Зиё, ЎзА