Ўтган 2025 йилда мамлакатимизда жами 11 минг 241 та ёнғин содир бўлган. Бунинг оқибатида 129 нафар фуқаро жароҳат олган, 82 нафари вафот этган. Ёнғин хавфи тизимига кирадиган объектлар томонидан ёнғин хавфсизлигига амал қилинмаётгани йирик ёнғинлар содир бўлишига олиб келмоқда.

Амалдаги қонун ҳужжатларида ёнғинларга алоқадор айрим ҳуқуқбузарликлар учун жавобгарлик белгиланмагани, ёнғинларнинг олдини олиш бўйича техник талаблар, профилактик чоралар тўлиқ қамраб олинмагани, айрим санкциялар жуда камлиги, бинолар фасадларида ёнувчан қурилиш материалларидан фойдаланилаётгани соҳага оид қонунчиликни янада такомиллаштиришни тақозо этмоқда.   

Шу мақсадда ишлаб чиқилган ёнғин хавфсизлиги тизимини такомиллаштиришга қаратилган қонун лойиҳаси парламент қуйи палатаси мажлисида биринчи ўқишда кўриб чиқилди.

Фавқулодда вазиятлар вазири ўринбосари Санжар Зуфаров қонун лойиҳаси ҳақида батафсил маълумот берди. 

Таъкидланганидек, ушбу қонун лойиҳаси билан “Ёнғин хавфсизлиги тўғрисида”ги қонунга, Маъмурий жавобгарлик тўғрисидаги, Жиноят-процессуал ҳамда Жиноят кодексларига тегишли ўзгартириш ва қўшимчалар киритиш таклиф этилмоқда.  

Хусусан, биноларнинг тоифасидан келиб чиқиб, техник талаблар, ёнувчан қурилиш материалларини ишлатишни тақиқлаш ва ёнғин натижасида етказилган зарарни қоплашдан ташқари айбдордан товон ундириш институтини жорий этиш назарда тутилмоқда.

Шунингдек, лойиҳа билан объектларни ёнғин хавфсизлиги талабларига мослиги бўйича аудитдан ўтказиш тартибини йўлга қўйиш белгиланмоқда.  

Мутасаддиларнинг ёнғин хавфсизлигини таъминлаш бўйича масъулияти ва шахсий жавобгарлиги оширилиб, лойиҳа ва қурилиш-пудрат ташкилотлари, кўп квартирали уйларни бошқариш органларининг ёнғин хавфсизлиги бўйича ҳуқуқ ва мажбуриятлари аниқ белгилаб бериляпти.  

Қонун лойиҳаси билан фуқароларнинг ёнғин хавфсизлигини таъминлаш бўйича мажбуриятлари доираси ҳам кенгайтирилмоқда.

Бундан ташқари, суюлтирилган углеводород газини чакана реализация қилиш тартибини бузганлик, ёлғон ёки нотўғри аудиторлик хулосасини тузиш ёки сертификатга эга бўлмасдан аудитда иштирок этганлик учун жавобгарлик механизмлари такомиллаштирилиб, соҳада превентив чоралар кучайтирилмоқда.  

Қолаверса, шаҳарсозлик фаолиятида рухсат бериш тартиб-таомилларига ноқонуний аралашганлик учун маъмурий ва жиноий жавобгарлик белгиланяпти.

Муҳокамалардан сўнг қонун лойиҳасини янада такомиллаштиришга келишилиб, биринчи ўқишда қабул қилинди.

Муҳтарама Комилова, ЎзА