Сувни иқтисод қилиш давр талаби. Оби-ҳаётни тежаб-тергаб ишлатган фермернинг шу кунларда бири икки бўлмоқда. Янгийўл туманидаги Ҳусан Ҳайдаров таъсисчилигидаги фермер даласидамиз. Бу ерда 37 гектарлик майдонда буғдой уруғи парвариш қилиниб, ёмғирлатиб суғориш тизими ўрнатилди. Натижа ёмон бўлмади. Сувдан, минерал ўғитдан, қишлоқ хўжалиги техникалари ва ёқилғидан иқтисод қилган фермер бу мавсумда катта даромад кутмоқда. У ўз тажрибасини Жиззах, Самарқанд, Сирдарё ва Тошкент вилоятидан келган туман фермерлар кенгаши раислари билан ўз даласида ўртоқлашмоқда.
“Ҳеч қанча пул кетмас экан, давлат томонидан субсидиялар олдим, ушбу ерни аукционда ютиб олиб, бор пулимни ушбу замин унумдорлигини оширишга сарфладим. Ғалламиз бир текис униб чиқди. 100 центнер ҳосил олишни мўлжаллаяпман. Келгусида бу ишларни яна давом эттираман”, - дейди хўжалик раҳбари семинар иштирокчиларига.
Дарҳақиқат, сув – улуғ неъмат, бутун олам тириклигининг манбаи. Оби-ҳаёт билан дастурхонимиз тўкин-сочин, бозорларимиз ноз-неъматларга тўла ва арзон, турмушимиз фаровон. Шундай экан уни ҳар томчисини асраб-авайлаб келажак авлодга етказиш бугунги куннинг долзарб масаласидир.
Келаётган деҳқончилик мавсуми олдидан Ўзбекистон Фермерлар кенгаши ташаббуси билан республикамиздаги барча вилоят, туман фермерлар кенгашлари раҳбар-ходимлари учун 2 кунлик ўқув-амалий семинар ташкил этилди.
Деҳқончилик мавсуми олдидан анъанавий ташкил этиб келинаётган мазкур ўқув семинарлари давомида тингловчилар асосан соҳадаги қонунчилик, ўзгариш ва янгиланишлар, инновацион технологиялар, ҳосил етиштиришнинг самарали усуллари ҳақида тўлиқ маълумотга эга бўлади ҳамда ўзаро тажриба алмашадилар.
<iframe width="650" height="420" src="https://www.youtube.com/embed/MMru0LEU3xk" title="Yomg‘irlatib sug‘orish tizimining afzaliklari o‘rganildi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Санжар Тошпўлатов, Дониёр Якубов, Улуғбек Тўхтаев, ЎзА