Олий Мажлис Қонунчилик палатасидаги Ўзбекистон “Миллий тикланиш” демократик партияси фракциясининг йиғилишида депутатлар “Йўл ҳаракати тўғрисида”ги қонун лойиҳасини иккинчи ўқишда қизғин муҳокама қилдилар.

— Йўл ҳаракатига оид амалдаги қонуннинг қабул қилинганига қарийб 9 йил бўлди, — деди фракция аъзоси Фарҳод Aшматов. — Бу қонун нормалари бугунги шиддат билан ўзгараётган замон талабларига, амалга оширилаётган ислоҳотларга тўла мос келмайди. Шу билан бирга, йўл ҳаракатини ташкил этиш билан боғлиқ муносабатларда бир қатор муаммо ва камчиликларни юзага келтирмоқда. Шу боис, ушбу қонун лойиҳаси ишлаб чиқилиб, унда йўл ҳаракатини ташкил этишга қўйиладиган умумий талабларга, йўл ҳаракатини ташкил этиш самарадорлигини таъминлаш тадбирларига, йўл ҳаракатини ташкил этишнинг асосий кўрсаткичларига ва техник воситаларига аниқлик киритилган. Йўлларда транспорт воситалари ҳаракатини чеклаш ёки тақиқлаш, тўхтаб туриш жойларига қўйиладиган талаблар, пулли тўхтаб туриш жойларидан фойдаланганлик учун тўлов ундирилмайдиган шахслар белгилаб олинди.  

Лойиҳада йўл ҳаракатини ташкил этишни ҳужжатлаштириш, йўл ҳаракати хавфсизлигини таъминлашга доир талаблар, йўл ҳаракати хавфсизлигини тиббий жиҳатдан таъминлаш каби нормалар кўп йиллик тажриба ва илмий изланишлар асосида қайта кўриб чиқилди.  

Йиғилишда фракция аъзолари қонун лойиҳаси бўйича ўз муносабат ва фикрларини билдирдилар. Жумладан, депутат Aбдумалик Aкрамов йўл ҳаракати хавфсизлиги билан боғлиқ ўзгаришларни қўллаб-қувватлаб, пуллик тўхтаб туриш масаласини кўтарди ва мамлакатимизда электромобиллар кўпаяётганини эътиборга олиб, автотураргоҳларда бундай автомобилларни қувватлантириш ускуналарини ўрнатиш таклифини ўртага ташлади.  

Депутатлар махсус машиналарга хорижда бўлгани каби бундай харажатлар учун алоҳида карточка берилиши лозим деган таклифни ўртага ташлади.  

Қизғин муҳокама ва савол-жавоблардан сўнг депутатларнинг бир неча таклифлари қонун лойиҳасида акс эттириладиган бўлди.  

Муҳтарама Комилова,  

ЎзА