Автомобиллар кўпайгани, албатта, автотураргоҳларни кўпайтиришни тақозо қилади. Лекин, дуч келган жойга чизиб, уни пулли қилиб қўйиш муаммога ечим бўла оладими?

Афсуски, йўқ. Чунки, бу амалиёт катта йўллардан кичик йўлларга ҳам кириб бормоқда. Бор-йўғи иккита автомобил сиғиши мумкин бўлган йўлнинг четига чизилгани оқибатида муаммолар гирдобига тушиб қолаётган йўллар бор. 

Масалан, Матбуотчилар кўчаси унчалик катта йўл эмас. Қолаверса, бу кўчада бир нечта катта қурилиш ишлари кетмоқда. Шунинг ҳисобига ҳам йўлнинг (айрим жойлари) янада торайган. Бир йўлак парковка учун чизилган, қатнов учун эса айни пайтда бир йўлак қолган. Қарама-қарши келган автомбиллар бир-бирига йўл бериб, амаллаб ҳаракатланмоқда. Шундай вазиятда “тез ёрдам” машинаси келиб қолишини тасаввур қилаверинг. 

Айнан шундай муаммолар, қолаверса, йўл чети парковкалари учун белгиланган нархлар ҳам кўпчиликка маъқул келмаяпди. Зеро, бу йўллар шу халқнинг пулига бунёд этилган. Кимдир чизиб қўйиб, нарх белгилаб, даромад қилаверса, бу адолатдан эмаску, ахир.  

Шунинг учун ҳам бу ҳолат аҳолининг, жамоатчиликнинг ҳақли эътирозига сабаб бўлмоқда. 

Коррупцияга қарши курашиш агентлиги Жамоатчилик кенгаши пулли автотураргоҳлар тўғрисида баёнот билан чиқди. 

Унда сўнгги кунларда Тошкент шаҳрида пулли автотураргоҳлар, унга нарх белгилаш масаласи ижтимоий тармоқ фойдаланувчилари ва жамоатчилик вакиллари орасида кўплаб мунозараларга сабаб бўлаётгани қайд этилган. Бунда, автотураргоҳлар ташкил этиш бўйича танловларнинг ёпиқ шаклда ташкил этилгани, нархларни белгилашдаги аниқ ҳисоб-китоб ёки мезонларнинг мавжуд эмаслиги аҳоли ўртасида турли саволларни келтириб чиқармоқда. 

“Маълумки, Жамоатчилик кенгашлари ташкилот ва жамият ўртасида кўприк вазифасини бажариши ҳамда энг муҳим масалалар бўйича жамоатчилик назорати механизмларидан фойдаланиб, ўрганиш ва эшитувлар ташкил этиши белгиланган. Шу боисдан, Жамоатчилик кенгаши Коррупцияга қарши курашиш агентлигидан кенгаш аъзолари билан биргаликда Тошкент шаҳридаги пулли автотураргоҳлар бўйича ўрганишлар ўтказиш, жараёнларнинг очиқлигини таъминлаш, нархлар бўйича асосланган меъёрларни белгилашга оид таклифлар ишлаб чиқишни сўрайди”, дейилган баёнотда. 

Албатта, ҳақли ва ўз вақтида билдирилган фикрлар. Аҳоли норози экан, бу масалада адолатли ечимни топиш бўйича мутасаддилар бош ботириши керак.

Норгул Абдураимова, ЎзА