Ўқитувчиларнинг таълим сифатини оширишга қаратилган инновацион ғояларини қўллаб-қувватлаш, уларнинг педагогик фаолиятини оммалаштириш мақсадида 3 босқичда “Йилнинг энг яхши ўзбек тили ўқитувчиси” танлови ташкил этилди.

Танловда Қорақалпоғистон Республикаси, вилоятлар ва Тошкент шаҳри мактабларининг икки нафардан она тили ва ўзбек тили фани ўқитувчилари иштирок этди. Дастлабки босқичда умумий ўрта таълим мактабларининг она тили ва ўзбек тили фани ўқитувчилари вазирлик томонидан ташкил этилган tiltanlov.bot боти орқали рўйхатдан ўтиб, “Мен тавсия этаман…” номли видео-тақдимотлари билан иштирок этди.  

16 октябрь куни танловнинг республика босқичига старт берилиб, иштирокчилар биринчи шартда “Устоз дилидаги ўйлар” мавзусида эссе ёзди. Иккинчи шартда эса “Ҳар бир кун – бу имконият, ҳар бир кун – бу келажак учун пойдевор” шиори остида "Ўзбек тили" ва "Она тили" фанларидан маҳорат дарслари ўтилди.    

Бугун эса пойтахтимизда Мактабгача ва мактаб таълими вазирлиги томонидан Вазирлар Маҳкамасининг Давлат тилини ривожлантириш департаменти, Ўзбекистон касаба уюшмалари Федерацияси билан ҳамкорликда танловнинг республика босқичи ғолибларини тақдирлаш маросими ўтказилди. Унда энг юқори балл тўплаган она тили ва ўзбек тили ўқитувчилари (ҳар бир ўринга 1 нафар она тили ва 1 нафар ўзбек тили устозлари) тақдирланди.  

[gallery-14113]

Ўзбек тили байрами арафасида ташкил этилган тадбирда биринчи ўринни қўлга киритган ғолиб “Йилнинг энг яхши ўзбек тили ўқитувчиси” I даражали дипломи, 25 миллион сўм пул мукофоти билан тақдирланди. Иккинчи ўринни олган ўқитувчи эса “Йилнинг энг яхши ўзбек тили ўқитувчиси” II даражали дипломи, моноблок ҳамда 3-ўринни эгаллаган ўқитувчи “Йилнинг энг яхши ўзбек тили ўқитувчиси” III даражали дипломи, ноутбук каби мукофотлар билан тақдирланди.  

Муҳайё Тошқораева, ЎзА