Жиззах шаҳрида “Йилнинг энг намунали маҳалла ёшлар етакчиси” танловининг вилоят босқичи якунига етиб, энг муносиблар аниқланди.

Йил поёнига етаётган бу паллада ҳар бир соҳада йиллик фаолият сарҳисоб қилинаётгани каби, маҳалла тизимида фидокорона меҳнат қилаётган ёшлар етакчилари ҳам ўзининг муносиб баҳосини олаётир.

Танловда турли йўналишларда фаолият юритаётган энг иқтидорли, ташаббускор ва жамоатчилик ҳаётида фаол ёшлар етакчилари иштирок этди. Улар фаолият юритаётган йўналишларнинг ўнтаси бўйича белгиланган мезонлар асосида баҳоландилар.

Ғаллаорол туманидан иштирок этган ёшлар етакчиси Акмал Маҳмудов “Алоҳида эътиборга муҳтож ёшлар билан самарали ишлаган энг намунали маҳалла етакчиси” йўналиши бўйича биринчи ўринни қўлга киритди.

– Мен мазкур йўналишда биринчи ўринни эгаллаганимдан жуда хурсандман, – дейди Акмал Маҳмудов. – Бу танлов орқали вилоятимиздаги ёшлар етакчилари қандай ташаббуслар билан чиқиш қилаётгани, маҳаллаларда қандай ишлар амалга оширилаётгани яна бир бор намоён бўлди. Ҳар бир йўналиш бўйича ғолиблар муносиб эди, омад эса 10 нафаримизга кулиб боқди.

Акмалнинг бу ютуққа эришиши  маҳалла ёшлари ўртасида соғлом муҳитни шакллантириш, иқтидорли ёшларни қўллаб-қувватлаш, уларни турли танлов ва лойиҳаларга жалб этиш, ватанпарварлик ғояларини тарғиб этиш борасида тинмай олиб борилган меҳнатининг амалий самарасидир.

Танлов якунларига кўра, биринчи ўрин соҳиблари бўлган 10 нафар, шунингдек, иккинчи ва учинчи ўринларни олган 20 нафар ёшлар етакчилари диплом, қимматбаҳо ва эсдалик совғалари билан тақдирланишди.

Абдужалол Қаюмов, ЎзА мухбири