Миллий матбуот марказида “Ўзбеккўмир” АЖ: 2021 йил якунида кутилаётган натижалар ва республикамиз аҳолисини маҳаллий кўмир билан таъминлаш имкониятлари” мавзуида анжуман бўлиб ўтди.

"Ўзбеккўмир" АЖ бош директорининг ўринбосари Эркин Ёқубовнинг маълумот беришича, жамият томонидан жорий йилда тасарруфдаги конлардан 4,45 миллион тонна кўмир қазиб олиш, истеъмолчиларга 4,8 миллион тонна кўмир етказиб бериш режалаштирилган. Жумладан, бу кўрсаткич иссиқлик электр станцияларига 3,3 миллион тонна, аҳолига 985 минг тонна, ижтимоий соҳа ташкилотларига 450 минг тонна, иқтисодиётнинг реал секторига 1 миллион тоннани ташкил этади.

– 2021 йилнинг 13 декабрь ҳолатига кўра, кўмир қазиб олиш ҳажми 4,56 миллион тоннадан ортди, – деди у. 

– Бу борадаги йиллик режа ортиғи билан бажарилди. Ўсиш суръати ўтган йилнинг шу даврига нисбатан 128 фоизни ташкил этмоқда. Жамиятда ўтган йил давомида 3,9 миллион тонна кўмир қазиб олинган эди. Бугунги кунда республика истеъмолчиларига 5 миллион 131 минг тонна кўмир етказиб берилган. Ижтимоий соҳа объектларига белгиланган 450 минг тонна кўмирни етказиб бериш 2021 йил 1 октябрга қадар бўлиб, “Ўзбеккўмир” АЖ ва “Кўмир таъминот” МЧЖ томонидан ушбу вазифага май ойидан киришилди ва йиллик режа 15 август куни бажарилди.

Таъкидланганидек, жойларда кўмир ёқилғиси тарқатиладиган “Кўмир таъминот” масъулияти чекланган жамияти тасарруфидаги 102 та ҳудудий кўмир омборлари ва савдо шохобчалари мавсумга ҳар томонлама тахт қилинган.

– Хусусан, омборларда ортиш ишларини жадал амалга ошириш мақсадида улар қўшимча 61 та юкловчи, 56 та махсус юк ташувчи транспорт воситаси, 89 та тарози билан таъминлангани ишни намунали ташкил этишда муҳим омил бўлмоқда, – деди “Кўмир таъминот» МЧЖ бўлим бошлиғи Бахтиёр Узоқов. 

– Бугунги кунда вилоятлар ҳокимликларидан жами 179,1 минг тонна қўшимча кўмир етказиб бериш бўйича мурожаатлар келиб тушган. Шунингдек, Қорақалпоғистон Республикаси Вазирлар Кенгаши ва Хоразм вилояти томонидан импорт ҳисобидан етказиб берилиши режалаштирилган кўмир ўрнига 10 минг тоннадан маҳаллий кўмир ажратиб бериш бўйича мурожаат қилинган. 

Аҳоли истеъмолчилари учун кунлик кўмир миқдори ўртача 4.5 минг тоннани ташкил қилмоқда. Омборларимизда 13 декабрь ҳолатига кўра 49 204 тонна кўмир захираси мавжуд.

Тадбирда 2021 йил якуни бўйича кутилаётган кўрсаткичларга ҳам тўхталиб ўтилди. Унга кўра, истеъмолчиларга 5 300 минг тонна кўмир етказиб берилади. Бу ўтган йилнинг мос даврига нисбатан ўсиш суръати 130 фоизни ташкил қилади. Аҳолига жорий йил 31 декабрга қадар қўшимча 100 минг тонна, иқтисодиётнинг реал секторига қўшимча 30 минг тонна кўмир етказиб бериш кўзда тутилган.

Насиба ЗИЁДУЛЛАЕВА, ЎзА