Гулистонда қотиллик содир бўлди.

Сирдарё вилоят прокуратурасининг хабарига кўра, Гулистон шаҳар Янги ҳаёт маҳалла фуқаролар йиғинида яшовчи Қашқирқул Кучукбоев (мақоладаги персонажларнинг исми-шарифи ўзгартирилди) жорий йилнинг 18 март куни пешин соат 14:40 да, ўзганинг пул маблағларини қўлга киритиш мақсадида, қариндоши (холаваччаси) Гулистон шаҳар Навбаҳор маҳалласида яшовчи фуқаро Имонжон Мўминовнинг уйига боради ва пичоқ билан баданига ўн маротаба уриб — қасддан ўлдирган.

...Қуёш пешиндан оққанда эшик “тақ” этмай аста очилиб, уйга кимдир кирганини эшитган Имонжон, “Онам ишдан бунча барвақт қайтибди, тинчликмикан?” деган хаёл билан деразадан ҳовлига қарайди. У ерда холасининг ўғли Қашқирқул, эшикни ичкаридан қулфлаб, олазарак ҳаракатланганига кўзи тушади. Имонжон эшикни очиб, унга пешвоз чиқади. Саломга жавобан, Қашқирқул, “Холам қани?” дея қон талашган кўзларини унга қадайди.

– Онам ҳали ишда, шомдан кейин қайтадилар, келинг ичкарига марҳамат, – дейди Имонжон Қашқирқулни қандай ниятда келганидан бехабар, уни уйга таклиф қилиб. Фотиҳага қўл очиб, дуо қилишга улгурмасдан, холаваччаси унинг гапини бўлади, “Э-э муллавачча, холамни ҳамма йиққан пуллари, тилла тақинчоқларини барини олиб чиқ, менга срочно пул керак”, дейди гапни қисқа қилиб.

Имонжон улар оддийгина яшаши холаваччасига-да маълум эканини айтади.

– Чалла мулла, тунов куни холам онамга, “Эртароқ тўй қилиб, Имонжонни бошини иккита қилиб қўйсам, уйимиздан чақалоқ йиғиси чиқмаганига 18 йил бўлибди, опа” деб оғиз кўпиртираётганини ўз қулоғим билан эшитдим. Пули йўқ одам тўй қиладими? Қолаверса, ҳали она сутинг оғзингдан кетмаган сенга хотинни нима кераги бор. Гапни чўзмада, бир сўмини ҳам қолдирмай олиб чиқ, акс ҳолда ёмон бўлади, – дея ёнидан пичоғини олади Қашқирқул.  

– Онам бечора, топганини менга сарфлади, ўзи емай, едирди, бошқаларни боласидан кам бўлмасин деб, ўзи киймай, кийдирди, ёлғиз, аёл боши билан қанча ҳам топарди, мен сизни тушунмаяпман, – дейди Имонжон.  

Қашқирқул, “Ҳали шунқами?”, дея қўлидаги пичоғини Имонжонга санчди. У оғриқдан “дод!” дея пичоқ санчилган жойини ушлаганча ташқарига қочмоқчи бўлади. Ўзидан ёши катта ва анча баққуват бўлган Қашқирқул, чап қўли билан унинг елкасидан маҳкам тутиб, ўнг қўли билан яна бир неча бор пичоқ уради. Бақувват бўласининг оғирлиги ва пичоқ зарбаларига дош беролмай Имонжон ерга қулайди. Оғриқ зўридан инграб ётган холаваччасини кўра туриб, унинг танасига вахшийларча яна бир неча бор пичоқ санчади...  

Гулистондаги ушбу воқеа инсон яхшиликлар билан бирга, ёмонликларни ҳам қила олишини исботлади. Инсон ҳаёти олдида ҳеч қадри бўлмаган пул учун ўз холавачча (бўла)сининг қотили бўлган инсонга қарата нима дейиш мумкин?

Ўша онда, онаизор қандай аҳволга тушди? 18 ёшли йигитни, 10-12 жойидан пичоқлангани, ёлғиз фарзанд эканидан эмас, балки шу муштипар она бу қотилликни ким содир этганини эшитганида ва бу қотил – ўзининг бир қориндан талашиб тушган опасининг боласи эканини билганида дилидан нималар ўтди?...

Айни пайтда, Қашқирқул Кучукбоевга нисбатан жиноят иши қўзғатилиб, Сирдарё вилоят прокуратураси томонидан дастлабки тергов ҳаракатлари олиб борилмоқда.

А.Қаюмов, ЎзА