Bodi kamera bilan ishlash jarayonida xodim yoʻl harakati qatnashchisini toʻxtatganidan keyin uning oldiga borib, oʻzini tanishtiradi va lavozimi, unvoni, familiyasi haqida maʼlumot beradi. Haydovchining talabiga koʻra koʻkrak nishon belgisini maʼlum qilib, xizmat guvohnomasini ochiq holda koʻrsatadi. Eng muhimi, yoʻl harakati qatnashchilariga mobil videokameradan foydalanayotganini maʼlum qiladi va kelgusida noqonuniy xatti-harakatlar sodir etsa, aybini isbotlash uchun undagi video yozuvdan foydalanishi mumkinligi haqida ogohlantiradi.

Hozirgi kunda Toshkent shahrida mobil videokameralarni test rejimida sinovdan oʻtkazish ishlari amalga oshirilmoqda. Sinov davomida kameralar turli ob-havo sharoitlarida va koʻrinishlarda, har xil holatlarda hamda vaziyatlarda ishlatib koʻriladi.

Sinov tekshiruvlarida aniqlangan kamchiliklar esa kameralarni ishlab chiqaruvchilarga yetkaziladi va bartaraf etiladi. Shuningdek, maʼlumotlarni saqlash qurilmalari, dasturiy taʼminot ham sinovdan oʻtkaziladi. Kelajakda yoʻllarda turli kelishmovchiliklar, ziddiyatlar, bahs va munozaralar kelib chiqmasligi aynan qurilma hamda dasturiy taʼminotning toʻgʻri va aniq ishlashiga bevosita bogʻliq.

Aytishga osondek boʻlib koʻringan bu vazifalar zamirida katta mehnat turibdi. Chunki, har qanday yangilikni joriy etish osonlik bilan amalga oshmaydi.

Mobil videokameralarning ishga tushirilishi, birinchi navbatda, shu soha vakillari uchun zarur. Sababi, kameralar orqali vaziyatni doimo nazorat qilib turish imkoniyati oshadi. Nazorat kuchaytirilgan joyda esa tartib-intizom boʻladi. Kameralar esa har bir holatni oshkora koʻrsatib beradi. Shu sababli barcha harakat ishtirokchilarini “Yoʻl harakati qoidalari”ga qatʼiy amal qilishga chaqiramiz.

Unutmang, yoʻl-patrul xizmati inspektori bilan oʻzaro munosabatingiz mobil videokameralar nigohida turibdi!