Танымал «Үйде жалғыз» фильмінде Кевин Маккалистердің анасы рөлін сомдаған актриса Кэтрин О’Хара 71 жасында дүниеден өтті. Бұл туралы Variety журналына оның менеджері хабарлаған.

Хабарда айтылуынша, актриса 30 қаңтарда Лос-Анджелестегі үйінде қайтыс болған. Актрисаның өлім себебі жарияланбаған.

Кэтрин О’Хара 1954 жылы 4 наурызда Торонто қаласында туған. Ол шығармашылық қызметін 1970 жылдары мультфильмдерге дауыс беруден бастаған. Актриса телеэкрандарда алғаш рет 1979 жылы «Canada After Dark» шоуында көрінген.

1976 жылы The Rimshots фильмінде толық рөл сомдаған актриса 1985 жылы «Жұмыстан кейін», 1988 жылы «Битлджус» фильмдерінде де өнер көрсеткен.

Алайда Кэтрин О’Хара ең үлкен танымалдыққа «Үйде жалғыз» фильмінде Кевиннің анасы Кейт Маккалистер рөлін сомдауы арқылы жеткен. Ол «Эмми», «Алтын глобус» және екі рет Киноактёрлар гильдиясы сыйлығына ие болған.