Бухоро вилояти ҳокимлиги Соғлиқни сақлаш бошқармаси раҳбарияти, бош мутахассислар, даволаш-профилактика муассасалари масъул мутасаддилари, ихтисослаштирилган марказлар директорлари ҳамда бош ҳамширалари иштирокида “Яшил макон” лойиҳаси доирасида Бухоро шаҳридаги “А.Сифатмуний” маҳалла фуқаролар йиғини ҳудудидан қарийб бир гектар майдонда “Шифокорлар боғи”ни барпо этишга киришилди. Халқимизнинг қадимий анъана ва урф-одатларига биноан дарахт ўтқазиш тадбири нуронийларнинг дуолари билан бошланди.

– Боғбонлар тавсиясига мувофиқ, боғ учун маҳаллий иқлим шароитида баравж ўсиб ривожланадиган садақайрағоч, можжевельник, каталпа каби манзарали дарахт кўчатлари сараланди, – дейди вилоят ҳокимлиги Соғлиқни сақлаш бошқармаси жамоатчилик билан ишлаш шуъбаси раҳбари Маъмурахон Сафоева. – Яхши биламизки, серқуёш заминимизда дарахт ўстириш, боғ барпо қилишнинг ҳам ўзига хос мураккабликлари бор. Шу боис кўкаламзорлаштирилаётган ҳудудда ўтқазилаётган кўчатлар парвариши учун вилоят қон қуйиш станцияси, республика ихтисослаштирилган тиббиёт муассасаларининг вилоят филиаллари жамоалари масъул сифатида бириктирилди. Энди боғдаги ҳар бир ниҳол агротехник талаблар асосида парвариш қилинади. 

Маълумот учун: айни кунда “Яшил макон” умуммиллий лойиҳасида фаол қатнашаётган вилоят ҳокимлиги Соғлиқни сақлаш бошқармаси тизимидаги даволаш-профилактика муассасалари ходимлари томонидан шаҳар ва туманларда 114 минг тупга яқин манзарали ҳамда мевали дарахт кўчати, вилоят марказидаги “Шифокорлар боғи”да эса бир кунда 200 тупга яқин манзарали дарахт кўчати ўтқазилди.

Зариф Комилов, Тоҳиржон Истатов (сурат),
ЎзА мухбирлари