Ўзбекистон Экологик партияси ҳамда партия фракцияси, Олий Мажлис Қонунчилик палатасининг Иқлим ўзгариши оқибатларини камайтириш ва “яшил” иқтисодиётга ўтишни тезлаштириш масалалари бўйича комиссияси, “Яшил иқтисодиёт ва тараққиёт” ижтимоий-иқтисодий, илмий-оммабоп журнали ҳамкорлигида “Яшил иқтисодиёт ва экологик барқарор ривожланишда илғор муҳандислик мактабларини шакллантириш муаммолари” мавзусида республика илмий-амалий конференцияси ўтказилди.

Конференцияда мамлакатимизда амалга оширилаётган “яшил” иқтисодий сиёсат, экологик барқарор ривожланиш ва замонавий муҳандислик ечимларини интеграциялаш, фан-таълим-ишлаб чиқариш ҳамкорлигини кучайтириш, қайта тикланувчи энергия манбалари, энергия самарадорлиги, сув ва қишлоқ хўжалигида рақамлаштириш, экологик таълим, инсон капитали салоҳиятини юксалтириш каби долзарб йўналишларни илмий-назарий ва амалий жиҳатдан муҳокама қилинди.

Қайд этилганидек, юртимизда қайта тикланувчи энергия манбалари улушини ошириш ва “яшил” иқтисодиётга ўтиш бўйича давлат сиёсати изчил амалга оширилмоқда. Президент Шавкат Мирзиёев раҳбарлигида ўтказилган энергетика соҳасига оид йиғилишда қайд этилганидек, мамлакатда анъанавий электр генерацияси билан бир қаторда қарийб 4 гигаваттлик муқобил қувватлар ишга туширилди ва жами генерацияда “яшил энергия” улуши айни пайтда 16 фоизга етди.

Ушбу кўрсаткич олдинги йилларга нисбатан салмоқли ўсиш бўлиб, Ўзбекистоннинг энергия хавфсизлиги, ресурс тежамкорлиги ва экологик барқарор ривожланишга қаратилган ислоҳотлари амалда самара бераётганидан далолат беради. Келгуси беш йилда яна 25 гигаваттли қайта тикланувчи энергия манбалари қурилиши режалаштирилган бўлиб, улар орқали йилига 64 миллиард киловатт соатдан зиёд “яшил энергия” ишлаб чиқариш кўзда тутилган.

Шунингдек, 2030 йилга бориб мамлакатимизда умумий электр энергияси генерациясида қайта тикланувчи энергия улушини камида 50 фоиздан ошириш бўйича аниқ стратегик мақсад қўйилган. Бу жараён нафақат ички бозор учун экологик тоза энергия манбаларини кўпайтириш, балки инвестиция муҳитини яхшилаш, саноатнинг технологик модернизациясини тезлаштириш ва энергетика тармоғида рақобатбардошликни оширишда муҳим аҳамият касб этади.

Бу каби ўтказиладиган муҳокамалар мамлакатда “яшил иқтисодий ўсиш” ва экологик барқарор тараққиётни таъминлашда янги ёндашувлар, инновацион ечимлар ва стратегик дастурларни шакллантиришга хизмат қилади.

Маълум қилинганидек, конференция якунларида ишлаб чиқилган илмий хулосалар ва амалий тавсиялар тегишли давлат дастурлари ва стратегик ҳужжатларга киритиш учун тақдим этилади.

Муҳтарама Комилова, ЎзА