Доно опа Муҳаммедова тиниб-тинчимас, ўз устида ишлашдан, изланишдан чарчамайдиган, иқтидорли ҳунарманд аёлларимиздан бири.

Пойтахтимизнинг Олмазор туманида истиқомат қилувчи ҳунарманд опа ўзбек халқининг кундалик турмуш тарзини акс эттирувчи композициялар, миллий ва замонавий қўғирчоқлар ясаш билан шуғулланиб келади. Доно опа ушбу ҳунарни ўзининг қизиқишидан келиб чиқиб мустақил ўрганганини, бу йўлда тинмай изланишда бўлганини айтади.

Миллий ҳунармандчилигимизнинг ҳар бир тури миллийлигимиз, халқимизнинг ўзига хос турмуш тарзи билан бевосита боғлиқ. Доно опа ҳам қўғирчоқчиликда миллий анъана ва урф-одатларимизга, ўзбекона удумларимизга алоҳида урғу беришга ҳаракат қилади. 

— Қора кийим кийиш, қора рўмол ўраш — бу мотам либоси ҳисобланади. Ҳар бир қўғирчоғимнинг дизайнида оналаримиз, момоларимиз кийган либослардан келиб чиқиб ёндашишга эътибор қаратаман. Момоларимиз доим ранг-баранг кийим кийишган, рўмолини ўраб, кўкрагининг устига ташлаб қўйган. Миллий қўғирчоқларимда айнан шу жиҳатларга эътибор қаратганман. 

Бундан ташқари, қўни-қўшничилик, ўзаро меҳр-оқибат, тансиқ таом пиширилганда, қўшнига улашиш каби урф-одатларимизни кўрсатишга қаратилган алоҳида композиция яратганман, — дейди опа. 

Доно опа нафақат миллий қўғирчоқлар, балки замонавий, Европа услубига хос қўғирчоқларни ҳам маромига етказиб ясайди ва безак беради. Ушбу йўналишдаги қўғирчоқларни кузатар эканмиз, либосларию бош кийимлари, безакларию тақинчоқлари бири-бирига уйғун, яхлит гўзаллик сифатида кўзни қувнатади. 

Доно опа қўғирчоқларни шунчаки ясаш ёки сотишни мақсад қилмаган. Уларнинг улкан мақсад ва режалари бисёр. Уй музейини ташкил қилиш, ёшларга, хорижий сайёҳларга миллий ўзига хослигимизни қўғирчоқлари орқали етказиш ниятида. “Ясаган қўғирчоқларим фарзандимдек қадрли, уларни бировга бергим келмайди”, дейди ҳунарманд опа.

Ҳунарманд аёлнинг меҳнат маҳсулларини кўздан кечирар экансиз, уларнинг ҳар бири ўз давридан сўзлаётганига, ўзбекона лутф билан боқаётганига гувоҳ бўласиз. Умид қиламизки, тегишли мутасаддилар Доно опанинг миллийлигимизни тарғиб қилишга қаратилган ушбу ҳунармандчилик намуналари кенг қулоч ёйишига, уй музейини ташкил қилишдек эзгу ниятларига қанот бағишлашга эътибор қаратишади. 

<iframe width="640" height="420" src="https://www.youtube.com/embed/cRebXRCNuR4" title="“Yasagan qo`g`irchoqlarim farzandimdek qadrli” " frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Муҳтарама Комилова,
Дониёр Якубов, Анвар Аҳмедов (видео),
ЎзА