Россия-Украина
Туркия Украина зиддиятини ҳал этишда воситачилик ролини бажаришга тайёр, дея баёнот берди Президент Режеп Таййип Эрдоған россиялик ҳамкасби Владимир Путин билан музокарадан сўнг.
– Минтақамизда мустаҳкам тинчлик, барқарорлик ва фаровонлик бўлиши учун саъй-ҳаракатни қатъий давом эттирамиз, – деди давлат раҳбари. – Биз илгари томонлар ўртасида тўғридан-тўғри музокара ўтказиш учун майдон яратиб бериш таклифини берган эдик. Ҳозир ҳам, аввалгидек, зарур бўлган барча амалларни бажаришга, воситачилик ролини зиммамизга олишга тайёрмиз.
Украина ташқи ишлар вазири Дмитрий Кулеба Киевнинг Россия билан низони ҳал этишга қаратилган, оралиқ қарорларни рад этиш бўйича қарашини яна бир бор тасдиқлади.
– Дипломатияга йўл жанг майдонидан бошланади, – деди у. – Киев инқироз музлатилишини қабул қилмайди. Муаммони ҳал этиш фақат Президент Владимир Зеленский таклиф этган “тинчлик формуласи” асосида амалга оширилади.
Кулеба “NHK” телеканалига интервьюсида “Яқин орада Киев ва Москва тинчлик музокараси ўтказишини кутиш керак эмас!”, дея баёнот берди. Вазир Германия канцлери Олаф Шольц томонидан Украинага қанотли “Taurus” ракеталари етказиб бериш бўйича яқин орада қарор қабул қилинишига умид билдирди. Аввалроқ Шольц ушбу масалада ҳамкорлар билан келишиши лозимлиги айтилган эди.
Президент Зеленскийнинг зиддиятни ғалабагача давом эттириш тўғрисидаги баёноти АҚШда норозилик туғдирди. Бу ҳақда Франциянинг, “Le Figaro” нашри шарҳловчиси Рено Жирар “Le Live” телеканали мухбири билан суҳбатда гапирган.
– Қўшма Штатлар Россия ва Украина низосини тинч йўл билан ҳал этиш тарафдори, аммо Зеленский НАТОнинг Вильнюсдаги июль саммитида америкаликларга ҳаддан ташқари босим ўтказди, давлати кечикмасдан Шимолий Атлантика альянсига қўшилиши жараёнини қўллашни сўради, – деди у. – Бу Вашингтоннинг ғашига тегди.
Франциянинг таниқли сиёсатчиси ва публицисти, 2002-2004 йиллар ёшлар, миллий таълим ва илмий тадқиқот ишлари вазири лавозимида ишлаган Люк Ферри “Киевнинг икки жиддий хатоси туфайли Украинада бугун шундай воқеалар содир бўлмоқда”, деди.
“CNEWS” телеканали мухбири билан суҳбатда собиқ мулозим ушбу хатолар ҳақида гапира туриб, 2014-2015 йиллар Минск битими, хусусан, “Минск-2” келишуви бажарилмагани, айниқса муаммони сепаратистларни Донбассга юбориб ҳал этмоқчи бўлганини таъкидлаган. Киевнинг кейинги камчилиги сифатида Россиянинг Қримдан чиқиб кетишини кутиш, 85 фоизи рус ярим орол аҳолисига нисбатан ёмон муносабат кўрсатилган. “Қрим русларнинг ери эканини тушунишни истамаганлар”, деди Ферри.
Руминиянинг “inpolitics” портали Украина Бухарест орқали НАТО ва Россия ўртасида кескинлик келтириб чиқаришга ҳаракат қилмоқда, деб ёзди. Мисол тариқасида Украина ТИВ бир неча бор Россиянинг учувчисиз учоғи Руминия ҳудудига кириб келди, дея хабар тарқатгани, ҳукумат эса бу ахборотга раддия берганини эслатди.
“Укринформ” агентлигига сўнгги интервьюсида собиқ мудофаа вазири Алексей Резников бир кунлик ҳарбий харажат Киев учун 100 миллион долларга тушаётганини айтган.
АҚШ Бош прокурори Меррик Гарленд май ойида санкцияга амал қилмагани учун россиялик олигархлар активини Украинага беришга рухсат бергани маълум бўлди, деб ёзди “Reuters” агентлиги.
Аброр ХОН, ЎзА