Анжуманда муҳокама этилаётган асосий мавзу дунё ҳамжамияти, жумладан японияликларни ҳам қаттиқ ташвишга солаётган коронавирус пандемиясидир.

Япония инфекционистлари илмий жамияти эътирофича, мамлакат ҳозир коронавирус эпидемиясининг иккинчи тўлқинини бошидан кечирмоқда.

"Биз ҳозир иккинчи тўлқиннинг қоқ марказида турибмиз. Муҳими - вазият ривожини эътибор билан кузатиб бориш. Мамлакат ҳам, Токио ҳам чамаси, вирус тарқалишининг энг юқори чўққисидан ўтмоқда. Шу билан бирга, касаллик яна кучайиб кетмаслиги учун эҳтиёт бўлиш лозим. Тахминларга кўра, иккинчи тўлқиндан кейин учинчи ва тўртинчи тўлқин келади. Демак, биз коронавирус шароитида яшашга одатланишимиз керак", - деди жамият раиси Казухиро Татэди “NHK” телеканали орқали.

Айни дам кун чиқар мамлакатда қарийб 58,5 минг киши коронавирус билан рўйхатга олинган, 1 148 киши вафот этган.