Tokiodagi mashhur “Kioi” san’at saroyida bo‘lib o‘tgan “Xalqaro kollaboratsiya” konsertida Glier nomidagi Respublika ixtisoslashtirilgan musiqa akademik  litseyi direktori Alisher Jamoliddinov boshchiligidagi  ijodiy jamoa ham ishtirok etdi.

Konsert dasturidan yapon, o‘zbek, koreys va malayziya xalqlarining noyob musiqa asarlari o‘rin oldi. Tomoshabinlar “Tanovar” va “Yo‘l bo‘lsin” milliy kuylarimiz, shuningdek, “Sharqona Fresko” o‘zbek-yapon qo‘shma musiqiy asari hamda bastakor Armug‘on Nizomidinxo‘jayeva tomonidan bastalangan “Ningni” asari ijrosidan bahramand bo‘lishdi.

Tadbir doirasida mahorat darsi ham tashkil etilib, unda  ishtirokchilar  chang, doira va g‘ijjak  kabi o‘zbek milliy cholg‘u asboblari bilan tanishdilar. 

– Konsert menda katta taassurot qoldirdi, - deydi  tomoshabinlardan biri Tanaka Xiroshi. – Ayniqsa, mahorat darsida qizim bilan o‘zbek musiqa  asboblarini chalib ko‘rdik. Bilasizmi, doiraning jarangdor ovozi kishini hayratga soladi. Men oilam bilan birga yurtingizga tashrif buyurib, o‘zbek milliy kuy-qo‘shiqlaridan yanada ko‘proq bahra olmoqchiman.

Mehmonlarni  O‘zbekiston madaniyati va  sayyohlik salohiyati bilan yaqindan tanishtirish maqsadida san’at saroyiga kiraverishda milliy hunarmandchilik burchagi ham tashkil etildi. 

Aziza Alimova tayyorladi, O‘zA