“The Guardian” нашри хабар беришича, Японияда кузатилган кучли ёмғир ва шамолдан ҳосил бўлган “Ханун” тўфони Окинава, Кагосима ҳудудларини қамраб олди, бўрон материк томон йўналишини ўзгартиришдан олдин аста-секин шимоли-ғарбга силжиди.

Мамлакат жануби-ғарбидаги бу икки префектурада 166 мингга яқин хонадон электр таъминотидан узилди.

Метеорология агентлиги маълумотига кўра, Шарқий Хитой денгизидан йўналган бўроннинг тезлиги соатига 222 км (138 миль)га чиқди.

“NHK” давлат телеканали Ёнғин ва табиий офатларни бошқариш агентлигига таяниб маълум қилишича, пайшанба куни эрталаб Япония пойтахти Токиодан 1600 км (1000 миль) жануби-ғарбда жойлашган, Окинавадаги машҳур сайёҳлик масканида икки киши ҳалок бўлган, жами 41 киши тан жароҳати олган.

Окинава пойтахтида жойлашган, префектуранинг асосий дарвозаси ҳисобланган Наха аэропорти икки кунга ёпилиб, бугун иш бошлади. Транспорт вазирлиги 304 та рейсни бекор қилган.

Маҳаллий “Окинава электр қуввати” компанияси ўз веб-сайтида маҳаллий вақт билан соат 10.36 ҳолатига кўра, 160 040 хонадон ёки жами уйларнинг тўртдан бир қисмида электр токи узилиши қайд қилинган.

Бундан ташқари, бироз шимолдаги Кагосима префектураси Амами оролларида, “Кюшу электр қуввати” ташкилоти баёнот беришича, 6550 га яқин хўжаликда электр таъминоти маълум муддатга ўчирилган.

“Ханун” тўфони туфайли пайшанба куни Тайвань шимолидаги мактаб, корхоналар ёпилди, 40 га яқин халқаро рейс бекор қилинди.

Муҳаррама Пирматова,

ЎзА