Токионинг Минато туманида 24 соат фаолият юритувчи Lawson дўконлар тармоғи янги технологик дўкон очди. Ушбу дўкон харидорларга хизмат кўрсатишда сунъий интеллект ва робот технологияларидан кенг фойдаланилиши билан ажралиб туради.

Дўконда ўрнатилган СИ тизими харидорларнинг хатти-ҳаракатларини кузатиб, уларнинг эҳтиёжларини таҳлил қилади ҳамда шахсийлаштирилган маҳсулот тавсияларини беради. Шунингдек, мижозларга овқат тайёрлашда хизмат кўрсатадиган робот-ошпазлар ҳам жорий этилган. Бу роботлар тез тайёрланадиган таомларни сифатли ва хавфсиз тарзда тайёрлашга қодир.

Янги тизимда KDDI Corp. компаниясининг рақамли технологияларидан фойдаланилган. Лаwсон дўконни синов майдончаси сифатида ишга туширган бўлиб, дастлаб технологияларнинг самарадорлигини баҳолайди. Синов натижалари ижобий бўлса, компания бу технологик ечимларни бутун мамлакат бўйлаб ўз дўконларида татбиқ этишни режалаштирган.

Япония дўконларида сунъий интеллект ва роботлар иштирокини кенгайтириш орқали харид тажрибасини замонавийлаштириш, инсон ресурсларига бўлган эҳтиёжни камайтириш ва хизмат кўрсатиш сифатини ошириш мақсад қилинмоқда.

<iframe width="640" height="420" src="https://www.youtube.com/embed/OEdPUDOfZrU" title="Yaponiyada sun’iy intellekt va robotlar ishtirokida zamonaviy do‘kon ishga tushirildi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Мадинабону Насриева, Улуғбек Тўхтаев (видео), ЎзА