Япония Молия вазирлиги ҳузуридаги Иқтисодий сиёсат тадқиқотлари институти томонидан ташкил этилган стажировкада Озарбайжон, Грузия, Арманистон, Марказий Осиё ва Болтиқбўйи давлатларидан делегатлар иштирок этди. Хусусан, Ўзбекистон томонидан Банк-молия академияси ходими ҳамда 10 нафар тингловчиси иштирок этиб, Япония Молия вазирлиги ҳузуридаги Иқтисодий сиёсат тадқиқотлари институтининг сертификатини қўлга киритишди.

Тадбир давомида иштирокчилар Япония ижтимоий таъминот ва солиқ тизими, пул-молия сиёсати, ҳукуматлараро фискал муносабатлар ва маҳаллий давлат молияси, фискал консолидация амалиёти каби халқаро солиққа тортишнинг сўнгги ўзгаришлари ва Осиёнинг иқтисодий муаммолари тўғрисида маълумотга эга бўлишди.

Шунингдек, кичик ва ўрта корхоналар учун молиявий сиёсат, ўзгарувчан дунёда солиқ-бюджет ва пул-кредит сиёсати каби қатор йўналишларда семинар-тренинглар ташкил этилди.

“Seminar on Economic Policies 2024” номи остида ташкил этилган стажировка мобайнида Токио фонд биржаси, Япония банки, Уэно солиқ идораси ва йирик компаниялардаги амалий жараёнлар билан танишилди.

Эслатиб ўтамиз, Банк-молия академияси ва Япония Молия вазирлигининг Иқтисодий сиёсат тадқиқотлари институти ўртасидаги ҳамкорлик қарийб 30 йилдан бери давом этиб келмоқда. Ўтган йиллар мобайнида Банк-молия академиясининг 250 нафарга яқин тингловчиси ва  мутахассислари Япония ҳукуматининг тўлиқ гранти асосида кунчиқар юртда янги билимларни ўзлаштириб, илғор тажрибаларни ўрганиб қайтди.

Жорий йилдан эса Банк-молия академияси тингловчилари салоҳиятидан келиб чиқиб, Япония томони квоталар сонини 10 тага оширган. Иқтисодий сиёсат тадқиқотлари институти вице президенти бир вақтнинг ўзида Банк-молия академиясининг фахрий биринчи проректори сифатида фаолият кўрсатиб келади. Томонлар биргаликда грант лойиҳалари ва илғор тажрибаларни ўрганишга доир турли тадбирларни амалга ошириб келаётгани ҳам академия ютуғидир.

ЎзАнинг қуйидаги YouTube иловаси орқали юртдошларимизнинг фикр-мулоҳазаларини кўриш мумкин.

<iframe width="560" height="315" src="https://www.youtube.com/embed/WD8UU207uCo?si=ArdC_VHvyQC6xS2K" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Беҳруз Худойбердиев,

ЎзА